ԵԱՀԿ ՄԽ համանախագահները, ԱՄՆ կառավարությունը լիահույս են, որ Հայաստանի եւ Ադրբեջանի նախագահների հնարավոր հանդիպումը հունիսին կհանգեցնի նրան, ինչին ձգտում ենք մենք բոլորս՝ ղարաբաղյան հակամարտության համապարփակ լուծման։ Այս մասին մայիսի 18-ին լրագրողներին ասել է Հայաստանում ԱՄՆ դեսպան Ռիչարդ Միլսը Երեւանում կայացած ԱՄՆ- Հայաստան բիզնես կոնֆերանսի շրջանակներում։
Դիվանագետի գնահատմամբ Վիեննայից ստացած լուրերը շատ հուսադրող էին։ «Դա ձեռքբերում էր, քանի որ 2 կողմն էլ հաստատել են 1994-1995թթ. համաձայնագրին հավատարիմ մնալու պատրաստակամությունը»,- նշել է Միլսը։ Նրա խոսքով՝ միջադեպերի հետաքննման համար մեխանիզմների ձեւավորման ուղղությամբ աշխատելու պատրաստակամությունը նույնպես պետք է դրական գնահատել, դա կողմերի բարի կամքի եւ պատրաստակամության դրսեւորում է։ «ԵԱՀԿ ՄԽ համանախագահները պատրաստ են հետեւողական լինել եւ զարգացնել այդ միտումը»,- ասել է Միլսը։