«Նաիրիտ» գործարանի նախկին աշխատակիցներն այսօր՝ մայիսի 19-ին, կրկին հավաքվել են Կառավարության շենքի մոտ. նրանք նամակ են պատրաստել ուղղված ՀՀ գլխավոր դատախազ Գեւորգ Կոստանյանին՝ պահանջելով քրեական գործ հարուցել «Նաիրիտ» գործարանի տնօրինության դեմ:
NEWS.am-ի թղթակիցը հայտնում է «Նաիրիտի» աշխատակլիցների խոսքով, իրենց բազմաթիվ բողոքներից ու ցույցերից հետո աշխատավարձը տրվել է շանտաժի միջոցով: Ըստ այդմ, «Նաիրիտ» ՓԲԸ-ի եւ նախկին աշխատակիցների միջեւ կնքվել է պայմանագիր, ըստ որի ընկերության աշխատակիցներին պարտադրվել է այդ պայմանագիրը ստորագրել, հակառակ դեպքում՝ իրենք չեն ստանա իրենց աշխատավարձերը: Ըստ այդ պայմանագրի՝ «Նաիրիտի» աշխատակիցները պետք է հրաժարվեն չվճարված աշխատավարձի վրա կուտակված տոկոսներից:
Այժմ նախկին աշխատակիցները պահանջում են նաեւ կուտակված տոկոսները:
«Մենք գլխավոր դատախազից պահանջում ենք քրգործ հարուցել «Նաիրիտի» տնօրինության դեմ եւ անվավեր ճանաչել այն պայմանագիրը, որը մենք ստիպված ենք եղել կնքել մեր աշխատավարձն ստանալուց առաջ»,-ասաց «Նաիրիտի» աշխատակիցներից տիկին Անահիտը:
Նշենք, որ այս պահին «Նաիրիտի» նախկին աշխատակիցները ստորագրում են Գեւորգ Կոստանյանին հանձնվելիք նամակի տակ: