Շատ եմ կարեւորում այսօր ազգությամբ թուրք մարդու այցը Հայաստան, սերունդները պետք է տեղյակ լինեն, որ Հայոց ցեղասպանության ճանաչումն այլեւս հետընթաց չունի։ Այս մասին մայիսի 19-ին՝ Երեւանում կայացած մամուլի ասուլիսի ժամանակ, ասել է Գերմանիայի Ալթոնայի քաղաքապետարանի խորհրդի անդամ, «Ձախեր» կուսակցության անդամ Հասան Բուրգուջուօղլուն։
«Բունդեսթագի կողմից Ցեղասպանության ճանաչումը շատ կարեւոր է նաեւ քրդերի եւ չերքեզների համար։ Հուսով եմ մի օր Թուրքիան խելքի կգա։ Հայ ազգը պետք է կարողանա մեր ներողությունն ընդունել»,- ասել է Բուրգուջուօղլուն։
Անդրադառնալով Թուրքիայի խորհրդարանում հայ պատգամավոր Կարո Փայլանի դեմ բռնության մասին հարցին՝ Բուրգուջուօղլուն նշեց, որ ինքը Փայլանի ընկերն է եւ ամեն կերպ դատապարտում է նման միջադեպերը։ «Մենք նաեւ շատ բարձր ենք գնահատում Հայաստանում հօգուտ Փայլանի կազմակերպած ցույցը։ Այսօր Թուրքիայում նկատվում են ֆաշիզմի դրսեւորումներ, մենք ամեն կերպ փորձում ենք տապալել դա»,- ասել է Հասան Բուրգուջուօղլուն։
