ԼՂՀ Ազգային ժողովւ խմբակցությունները հանդես են եկել համատեղ հայտարարությամբ, որտեղ դատապարտում են Օսմանյան Կայսրությունում հույների հանդեպ իրականացված ցեղասպանությունը:
Հայտարարությունում ասվում է.
«- Հիմք ընդունելով միջազգային իրավունքի հիմնարար սկզբունքները եւ ցեղասպանությունը դիտարկելով որպես մարդկության դեմ ուղղված ծանրագույն հանցագործություն,
– Համոզված լինելով, որ ցեղասպանությունների ճանաչումը եւ դատապարտումը թույլ կտա կանխել նոր ոճրագործությունները,
– Արձանագրելով հայ եւ հույն ժողովուրդների դարավոր բարեկամությունը եւ համերաշխություն հայտնելով Արցախի Հանրապետության հունական համայնքին՝
Լեռնային Ղարաբաղի Հանրապետության Ազգային ժողովի խմբակցությունները
Դատապարտում են Օսմանյան կայսրությունում հույների հանդեպ իրականացված ցեղասպանությունը»:
Հայտարարությունը ստորագրել են ԼՂՀ Ազգային ժողովի «Հայրենիք», «Ժողովրդավարություն», «Դաշնակցություն», «Շարժում-88» եւ «Վերածնունդ» խմբակցությունները:
Նշենք, որ այսօր նշվում է Օսմանյան Կայսրությունում պոնտոսցի հույների ցեղասպանության տարելիցի օրը:
