Ազգային ժողովի պատգամավոր, նախկին ԲՀԿ-ական Կարո Կարապետյանը՝ «Յուվեցի Կարոն» պնդում է, որ Քաղցրաշենի բերքի վերամշակման գործարանի հետ որեւէ առնչություն չունի: NEWS.am-ի հետ զրույցում նա նշեց, որ քացրաշենցի խաղողագործների գումարը չի վերադարձրել գործարանը վարձակալած Ավետիք Գալստայնը եւ նա էլ պետք է վճարի գյուղացիներին:
«Ես խաղողագործների, խաղողն հանձնելու հետ ընդհանրապես կապ չունեմ: Հանձնել են Ավետիք Գալստյանին, թող նա էլ պատասխան տա իր արարքների համար, գործարանն արենդավորել եւ խաղողը մթերել է նա: Գյուղացիները հանձնել են խաղողը Ավետիքին, նա էլ գնել ա, պարտավորվել ա, որ գումարը կտա: Ես ընդհանրապես դրա հետ կապ չունեմ: Ընդունել ա, Ավետիքը, թող ինքն էլ պատասխան տա»,-ասաց նա:
Կարո Կարպետյանի խոսքով, ապրիլի 21-ին վարչապետն ընդունել է Քաղցրաշենի մի քանի խաղողագործների, որին ներկա են եղել նաեւ Ավետիք Սարգսյանն ու ինքը. «Ես անձամբ եմ պարտավորեցրել նրան, որ գյուղացիների գումարը վճարի, ես չեմ հասկանում, թե ինչու է իմ անունն անընդհատ շոշափվում, ես միշտ գյուղացիների կողքին եմ եղել»:
Հարցին, թե եթե ինքն առնչություն չունի այդ խնդրի հետ, ինչո՞ւ է վարչապետի հետ հանդիպմանը նաեւ ինքը հրավիրվել, Կարո Կարապետյանն արձագանքեց. «Ես գնացել եմ, որ Ավետիքի ականջները քաշեմ, ասեմ գումարները վճարի»:
Հիշեցնենք, որ գյուղացիներն անցած տարվա մթերած բերքի գումարը մինչ օրս չեն ստացել։ Խաղողը մթերած «Վինար» ՍՊԸ-ն քաղցրաշենցիներին, ինչպես նաեւ 10 այլ գյուղերի բնակիչներին պարտք է մոտ 160 միլիոն դրամ:
Քաղցրաշենցիներից բացի, «Վինար» ՍՊԸ-ն խաղողի մթերման համար պարտք է Շահումյան, Այգեպատ, Այգեզարդ, Նարեկ, Ոստան, Վերին Արտաշատ, Նորաշեն, Հնաբերդ, Փոքր Վեդի բնակիչներին:
