Հայկական կողմը կարող էր շփման գծում ամեն բան վերադարձնել 1-2 օրում։ Բայց պետք է մտածենք, թե ինչ գին մենք դրա համար կվճարեինք եւ ինչ կստանայինք։ Այս մասին մայիսի 20-ին՝ խորհրդարանական ճեպազրույցների ժամանակ, ասել է ՀՀԿ խմբակցության ղեկավար Վահրամ Բաղդասարյանը։
Դիտարկմանը, թե վերջին 22 տարում հայկական կողմը առաջին անգամ հող կորցրեց, Վահրամ Բաղդասարյանը պատասխանել է. «Վերջին հազարամյակների ընթացքում առաջին անգամ հայկական կողմը 90-ական թվականներին հող ձեռքբերեց, եւ բնականաբար նման իրադարձությունների ժամանակ այդ հող կորցնելը մի քիչ վերացական հասկացողություն է:
Պետք է խոսենք՝ ի՞նչ կորցրեց, եւ եթե չկորցներ, ի՞նչ կշահեր դրանից, եւ եթե հետ վերցնենք, դրանից ի՞նչ կկորցնենք: Ինձ թվում է, որ դրան պետք չէ այդպիսի նշանակություն տալ, եթե անհրաժեշտություն լինի, ես բացահայտ հայտարարում եմ՝ դա մեկ-երկու օրվա խնդիր էր, այդ ամենը վերադարձնելը»,- ասել է նա։
Այդ դեպքում, ըստ Բաղդասարյանի, արդյունքները եւ հետեւանքները կարող էր շատ ծանր լինել. «հարկավոր է ավելի խորամիտ լինել, այդ հետեւանքների մասին մտածել, ոչ թե այն հողը, որն ընդհանրապես որեւէ ռազմավարական նշանակություն չունեցող, չմշակվող, ամայի տարածք էր, որի մասին ընդհանուր առմամբ մենք երկար ենք խոսել եւ դեռ պետք է շարունակենք խոսել: Ինձ թվում է պետք չէ ծանրանալ այդ խնդրի վրա»:
