Երեւանի Ավան վարչական շրջանի Բաբաջանյան փողոցի հարակից պուրակում այսօր՝ մայիսի 23-ին, բացվեց Խորհրդային միության հերոս, ԽՍՀՄ զրահատանկային զորքերի գլխավոր մարշալ Համազասպ Բաբաջանյանի արձանը (ֆոտոռեպորտաժ):
Բացումը տեղի ունեցավ նախագահ Սերժ Սարգսյանի, Պաշտպանության նախարար Սեյրան Օհանյանի, Երեւանի քաղաքապետ Տարոն Մարգարյանի մասնակցությամբ: Ներկա էին նաեւ Մեծ պատերազմի վետերաններ, Եվրոպայում ԱՄՆ ցամաքային ուժերի հրամանատար գեներալ- գնդապետ Ֆրեդերիկ Բեն Հոջեսը, ԱՄՆ Կանզաս նահանգի ադյուտանտ- գեներալ, ազգային գվարդիայի նահանգի հրամանատար գեներալ-մայոր Լի Տաֆֆանելլին եւ օտարերկրյա պետությունների ռազմական կցորդներ, երեւանաբնակ չարդախլեցիներ:
Արձանը բացեցին Սեյրան Օհանյանը, քանդակագործ Համլետ Մարտինյանը ու նրա թոռնուհին: Այնուհետեւ նախագահն ու մյուս ներկաները ծաղիկներ դրեցին արձանին:
Արձանի քանդակագործն է Համլետ Մարտինյանը, ճարտարապետն է Միքայել Միսակյանը:
«Ինքն ամենահայրենասեր հայերից մեկն է եղել: Ինքը մեծ հայրենասեր է եղել, լավ գյուղացի: Ես իրեն սկզբում ուզում էի քանդակել տնկին ձեռքը, ծառ տնկելիս: Այս արձանում հողագործն է, մեծ հրամանատարը, հայրենասերը: Եթե շորերը հանես, գյուղացու շոր էլ հագցնես, ինքը հզոր է», - NEWS. am-ի հետ զրույցում ասաց քանդակի հեղինակ Համլետ Մարտինյանը:
Նշենք, որ Երեւանի պատվավոր քաղաքացի, գրոսմայստեր Ռաֆայել Վահանյանը եւ Հայաստանի շախմատային ֆեդերացիայի փոխնախագահ Հովիկ Խալիկյանը Հանրապետության նախագահին հանձնեցին մարշալ Բաբաջանյանին պատկանող շախմատը, որը նվիրաբերել են զորավարի ժառանգները:
