Փախստականներ ընդունելու հարցում Եվրամիության հնարավորությունները սահմանափակ են, Միության երկրները ի վիճակի չեն միլիոնավոր ներգաղթյալների ընդունել: Այս մասին հայտարարել է Եվրահանձնաժողովի նախագահ Ժան Կլոդ Յունկերը, հայտնում է «ՌԻԱ Նովոստին»:
«Մենք միլիոնավոր փախստականների ընդունելու հնարավորություն չունենք»,- ասել է նա՝ ելույթ ունենալով Լյուքսեմբուրգում ԵՄ երկրների խորհրդարանների խոսնակների համաժողովին: Ելույթը հեռարձակում էր Եվրահանձնաժողովի վիդեո- ծառայությունը:
Եվրահանձնաժողովի նախագահը նշել է Թուրքիայի հետ ԵՄ միգրացիոն համաձայնագրի կատարման կարեւորությունը, մասնավորապես Հունաստանում փախստականների ճգնաժամը կարգավորելու համար, որտեղ նրա խոսքով, հիմա ավելի քան 15 հազար միգրանտ կա:
ԵՄ մտնող փաախստականների ու ներգաղթյալների թիվը սահմանափակելու վերաբերյալ Բրյուսելի ու Անկարայի միջեւ համաձայնագիրը ուժի մեջ է մտել մարտի 20-ին: Ըստ դրա՝ մարտի 20-ից Թուրքիայի տարածքով Հունաստան մտնող բոլոր ապօրինի ներգաղթյալները կվերադարձվեն Թուրքիայի տարածք: Դրա փոխարեն ԵՄ-ն պարտավորվել է Թուրքիայից ընդունել սիրիացի փախստականներին՝ «1-ը 1-ի դիմաց» սկզբունքով: