Մեծ Բրիտանիայի իշխանությունները փախստականի կարգավիճակ են տրամադրել Մալդիվյան Հանրապետության նախկին նախագահ Մոհամեդ Նաշիդին, որը 13 տարվա ազատազրկման էր դատապարտվել ահաբեկչության մասին օրենքի խախտման համար, հայտնում է Ռոյթրզ գործակալությունը` վկայակոչելով նրա փաստաբանին:
Մալդիվների իշխանությունները հունվարին Նաշիդին թույլ են տվել Մեծ Բրիտանիա այցելել թիկունքի ուժեղ ցավերի դեմ վիրահատություն անցնելու համար: Նախկին նախագահը ազատվել է այն պայմանով, որ վիրահատությունից հետո երկիր կվերադառնա բանտարկության մնացած ժամանակը լրացնելու համար:
«Միացյալ Թագավորությունում Նաշիդին փախստականի կարգավիճակ է տրամադրվել», — գործակալությանը հայտնել է նախկին նախագահի փաստաբան Հասան Լատիֆը:
2008-ին Մոհամեդ Նաշիդը Մալդիվյան Հանրապետության առաջին ժողովրդական եղանակով ընտրված նախագահն է դարձել, բայց 2012-ին տապալվել եւ 2015-ի մարտին մեղավոր է ճանաչվել ահաբեկչական գործունեության համար: Պաշտոնական մեղադրանքի համաձայն, Նաշիդը մի շարք օրինախախտումներ է թույլ տվել, որոնք ընկնում են ահաբեկչության մասին օրենքի իրավասության տակ: Նախկին նախագահի ձերբակալությունը եւ բանտարկությունը դատապարտվել են միջազգային հանրության կողմից, որը համարում է, որ արարողակարգը չի համապատասպանել դատական գործի վարման ստանդարտներին, հայտնում է «ՌԻԱ Նովոստին»: