Ահաբեկչական ԻՊ խմբավորումը կանանց ռազմական նախապատրաստություն է իրականացնում Արեւմուտքի վրա հարձակվելու համար, հայտնում է ՏԱՍՍ-ը` վկայակոչելով «Ա-բե-սե»-ին:
Պարբերականի տվյալներով, ահաբեկչության դեմ պայքարի ոլորտում փորձագետները Սիրիայում ԻՊ-ի ճամբարների առկայություն են արձանագրել, որոնք զբաղվում են բացառապես կանանց նախապատրաստելով Արեւմուտքի երկրների վրա հարձակումներին: Միաժամանակ նշվում է, որ թույլ սեռի ներկայացուցիչների ֆիզիկական նախապատրաստությունն իրականացվում է «տղամարդկանց հավասար»:
Թերթը հավելում է, որ ԻՊ-ի ահաբեկիչները իրենց շարքերում «կանանց ներգրավումից բազմաթիվ առավելություններ են ստանում»: Մասնավորապես, ընդգծվում է, որ կանանց նկատմամբ վերահսկողության մակարդակն ավելի ցածր է: Բացի այդ, «հարգելով իսլամի խստությունը, տղամարդուն արգելվում է կանանց անձնական խուզարկություն իրականացնել»:
ԻՊ-ը` իսլամական ահաբեկչական կազմակերպությունը 2013-2014 թթ-ին գործել է ԻԼԻՊ անվանումով առավելապես Իրաքի եւ Սիրիայի տարածքում: 2014-ի հունիսին այն հայտարարել է գրավված տարածքներում «իսլամական խալիֆայության» (կառավարման շարիաթական ձեւով պետության) ստեղծման մասին եւ այն վերանվանել է «Իսլամական պետություն»: ԿՀՎ-ի գնահատականով, խմբավորումը մոտ 30 հազար անդամ ունի, Իրաքի իշխանությունները 200 հազարի մասին են հայտնում: Իսլամիստների շարքերում 80 պետության քաղաքացիներ կան, այդ թվում` Ֆրանսիայի, Մեծ Բրիտանիայի, Գերմանիայի, Մարոկկոյի, Սաուդյան Արաբիայի, ԱՄՆ-ի, Կանադայի եւ այլն:
