Այսօր Երեւանում բարձրացած ուժեղ փոթորկի հետեւանքով տուժած 9 մարդ բժշկական կենտրոններ է դիմել (ֆոտոռեպորտաժ):

6 տուժածների շտապօգնությունը տեղափոխել է «Աստղիկ» բուժկենտրոն: Կլինիկայի գլխավոր բժիշկը NEWS.am-ի թղթակցին տեղեկացրեց, որ նրանցից 5-ը թեթեւ քերծվածքներ է ունեցել եւ, առաջին օգնություն ստանալով, տուն է գնացել: Վեցերորդ տուժածը գլխի վնասվածք ունի եւ դեռեւս պետք է հետազոտություն անցնի:

Փոթորկի հետեւանքով երկու տուժած էլ «Արմենիա» ԲԿ է տեղափոխվել. նրանցից մեկը գլխի թեթեւ վնասվածք է ստացել, մյուսը՝ ճակատին քերծվածքներ: Երկուսին էլ առաջին բուժօգնություն է ցուցաբերվել եւ հոսպիտալացնելու կարիք չի եղել:

Գլխի վնասվածքով «Հերացի» համալսարանական հիվանդանոցային համալիր է տեղափոխվել 1993 թվականին ծնված մի կին: Նրա խոսքով, տանիքից գլխին քար է ընկել: Նրա վնասվածքը մշակել են եւ տուն ուղարկել:

Ժամը 20:30-ի սահմաններում «Հերացի» համալիր են բերել նաեւ 8 ամսական երեխայի, որը փոթորկի ժամանակ գլխով հարվածել է մանկասայլակի եզրին: Սակայն քանի որ հաստատությունում մանկական բաժանմունք չկա, փոքրիկին ուղարկել են «Սուրբ Աստվածամայր» ԲԿ:

Հիշեցնենք, որ մայիսի 23-ին Երեւանում անսպասելիորեն փոթորիկ է բարձրացել: Ուժեղ քամին պոկել է շենքերի տանիքները, արմատախիլ արել ծառեր, քշել անցորդներին։