Այսօրվա դրությամբ կարելի է ասել, որ ավելի քան 80 տոկոսով եզդիներով բնակեցված իրաքյան Շանգալ քաղաքը ազատագրված է: Այս մասին մայիսի 24-ի մամուլի ասուլիսի ժամանակ ասել է եզդիների ազգային միավորման նախագահ Ամո Շարոյանը:
Շանգալը հիշեցրել է նա, 2014-ի օգոստոսին ենթարկվել է «Իսլամական պետություն» կոչվող հրեշների հանցագործություններին: «Նրանք եզդիների նկատմամբ այնպիսի հանցագործություններ են արել, որոնք նույնիսկ ամենասարսափելի ֆիլմերում հնարավոր չէ տեսնել՝ գլխատել են, երեխաներին սպանել մայրերի աչքերի առաջ, աղջիկներին ու կանանց գերեվարել ու վաճառել ստրկության: Եվ այս ամենը 21-րդ դարում»,- շեշտել է Ամո Շարոյանը:
Ցավոք շարունակել է նա, այն պետությունները, որոնք պետք է զբաղվեն Շանգալ քաղաքի վերականգնման հարցերովմ դեռ չեն հանգել ընդհանուր հայտարարի: «Երբ վերջերս ԵՄ-ն ուզում էր Թուրքիային ու նրա նախագահ Ռեջեփ Թայիփ Էրդողանին 6 մլրդ եվրո հատկացնել փախստականներին օգնելու համար, մենք կոչ էինք անում ոչ թե 6, այլ գոնե 1 մլրդ եվրոն հատկացնել Շանգալի եզդիներին, որպեսզի նրանք կարողանան վերականգնել իրենց տներն ու վերադառնալ այնտեղ: Նրանցից ոչ մեկը չի ուզում փախստական դառնալ »,- նշեց Ամո Շարոյանը՝ հավելելով, որ այսօրվա դրությամբ եզդիների ազատագրական պայքարի մարտիկները ի վիճակի են ապահովել Շանգալի անվտանգությունը:
