Արցախցի 19-ամյա Մարատ Պետրոսյանը ապրիլյան քառօրյա պատերազմի օրերին հակառակորդի 5 տանկ է խոցել, 1 հետեւակի մարտական մեքենա, պարգեւատրվել «Մարտական խաչ» առաջին աստիճանի շքանշանով, հաղորդում է Արցախի հանրային հեռուստաընկերությունը:
«Առաջինը խփեցի, չդիպավ, երկրորդը արդեն կրակել եմ, կպել ա: Մարդիկ արդեն ասում էին՝ հեն ա, Մարատը, ես էլ չէի ջոկում՝ ինչ ա կատարվում, հետո որ ասեցին, էդտեղ հասկացա, թե ինչ լուրջ աշխատանք եմ արել»,- պատմել է Մարատը, որը նախքան այդ հակատանկային կայանքից կրակելու փորձ չի ունեցել:
Մարատ Պետրոսյանի մայրը պատմել է, որ պատերազմի առաջին օրերին լուր չեն ունեցել որդուց, հետո զանգել, ասել է, որ հակառակորդի 5 տանկ է ոչնչացրել:
«Առաջին երկու օրը խաբար չկար, hետո զանգեց, ասեց՝ էսպես ա, խփեցի տանկ: Այ տղա, ասում եմ, ո՞նց՝ խփեցիր տանկ: Մենք պատկերացում չունեինք՝ ինչ է կատարվում դիրքերում»,- պատմել է Մարատի մայրը:
Մարատի եղբայրը Դավիթ Պետրոսյանն է, այն մարզիկը, որին Ուկրաինայի Լվով քաղաքում անցկացվող Կունգ-ֆուի Եվրոպայի առաջնության ժամանակ ադրբեջանցի մարզիկը փորձել էր հարվածել, ապա ադրբեջանական թիմի մարզիչներն ու մարզիկները մահակներով հարձակվել էին Հայաստանի հավաքականի անդամների վրա:
Դավիթը պատմել է, որ իրեն նախորդող մենամարտը նույնպես հայերի եւ ադրբեջանցիների միջեւ է եղել, ադրբեջանցի մարզիչների բողոքով մրցավարները հաղթանակը տվել են Ադրբեջանի ներկայացուցչին եւ Դավիթը մտադրվել է համարժեք պատասխան տալ:
«Ասեցի՝ ես իրան շատ առավելությամբ պիտի կրեմ ու ռինգում խայտառակ անեմ: Իրան գցում էի, ոտքս դնում վրան, մերոնք խնդում էին, սրանք իրանց լավ չէին զգում: Մեկ էլ հետեւից ինձ բան ասեցին, ես մոտեցա ավելի վատ ասեցի, մեկը հելավ որ ինձ խփի, ես էլ խփեցի, սաղ բարձրացան ռինգ, կռիվ սկսվեց»,- պատմել է Դավիթը:
