Ամառվա ընթացքում Թալիշ վերադարձողների հոսքը կավելանա: Այս մասին NEWS.am-ի թղթակցի հետ զրույցում վստահեցրեց Արցախի Հանրապետության նախագահի մամուլի խոսնակ Դավիթ Բաբայանը` պատասխանելով հարցին, թե եթե Թալիշում անվտանգ է, ինչպես Սեյրան Օհանյանն է հայտարարել, ինչու մարդիկ չեն վերադառնում իրենց տները:
«Նրանք, որոնք տեղափոխվել են այլ վայրեր, դպրոցներ են գնում, այժմ էլ ավարտական փուլ է: Չվերադառնալու պատճառներից մեկն էլ հենց դպրոցն է: Կարծում եմ` ամառվա ընթացքում վերադարձողների հոսքը կավելանա»,- ասաց Դավիթ Բաբայանը:
Ըստ նախագահի մամուլի խոսնակի` թալիշցիներն ուզում են վերադառնալ, բայց ժամանակ է պետք, Կառավարությունն էլ արդեն իսկ սկսել է տարբեր ծրագրեր իրականացնել. «Բայց կարող է մի քիչ երկար տեւել, ամեն ինչ արվում է, որ նրանց սոցիալ- տնտեսական վիճակը բարելավվի»:
Նշենք, որ Սեյրան Օհանյանը մայիսի 23-ին լրագրողների հետ զրույցում նշել էր, որ Թալիշ գյուղի բնակիչները կարող են վերադառնալ իրենց տները, քանի որ այժմ այնտեղ անվտանգ է։
Ի դեպ, այս հայտարարությունից ընդամենը մեկ օր առաջ Արցախի վարչապետ Արայիկ Հարությունյանն էլ «Ազատություն» ռադիոկայանի հետ զրույցում նշել էր, թե Արցախի իշխանությունները առայժմ նպատակահարմար չեն գտնում քաղաքացիական բնակչության վերադարձը այդ բնակավայր: