2015-ին Հայաստանում միջին թոշակը կազմել է 41 հազար դրամ: Այս մասին մայիսի 26-ին՝ խորհրդարանում 2015-ի պետբյուջեի կատարողականի հաշվետվությունը ներկայացնելիս, ասել է ՀՀ աշխատանքի եւ սոցիալական հարցերի նախարար Արտեմ Ասատրյանը:
Նրա խոսքով՝ 2014-ի հետ համեմատած՝ միջին կենսաթոշակն աճել է 14 տոկոսով: Աշխատանքային թոշակների համար ՀՀ բյուջեից կատարված ընդհանուր ծախսերը կազմել են 221.7 մլրդ դրամ կամ 14 տոկոսով ավելի շատ, քան 2014-ին:
2015-ի հունվարի 1-ից բազային կենսաթոշակը 14 հազարից բարձրացել է մինչեւ 16 հազար դրամ, իսկ աշխատանքային փորձի առաջին տասը տարվա համար 1 տարվա դիմաց հավելավճարը 700-ից դարձել է 800 դրամ, իսկ դրան հաջորդած տարիների համար՝ 400-ից 500 դրամ:
