«Քաղաքացիական հասարակության պլատֆորմը» փաստաթուղթ է հրապարակել Ադրբեջանում կալանավայրերում խոշտանգումների դեպքերի աճի մասին, հայտնում է contact.az-ը:
Փաստաթղթում նշվում է, որ ծառայողական դիրքը չարաշահած եւ անմեղ քաղաքացիների դեմ խոշտանգումներ իրականացրած անձանց նկատմամաբ ոչ մի պատժիչ միջոց չընդունելը նպաստում է նման հանցագործությունների աճին:
Փաստաթուղթը հիշեցնում է, որ վերջին մեկ տարում բանտերում մահացել են Փարվիզ Միքայիլովը, Էլշադ Բաբաեւը, Նուրանի Իբրահիմովը, Բահրուզ Հաջիեւը, Ռաշադ Մեհտիեւը: «Խոշտանգումների վերջին դեպքերը Հեյդար Ալիեւի արձանի վրա մակարգություն («Շնորհավոր ձեր տոնը, ստրուկնե՛ր») թողած Գիյաս Իբրահիմովի եւ Բայրամ Մամեդովի նկատմամբ անմարդկային եւ արժանապատվությունը ոտնահարող վերաբերմունքն է եղել: Եվ օմբուդսմենի կողմից դա հերքելու փորձերը վկայում են, որ վատ վերաբերմունքը ոչ միայն չի նվազում, այլ նաեւ աճում է», - ասված է փաստաթղթում:
Պլատֆորմը նշում է, որ Ադրբեջանը խոշտանգումներ թույլ չտալու մասին պարտավորություններ է ստանձնել: Ի հեճուկս դրան՝ Ադրբեջանի կառավարությունը շեղվում է իր պարտականությունների կատարումից: Բացի այդ, Բաքուն խոչընդոտում է խոշտանգումների շուրջ տիրող իրավիճակի մշտադիտարկման մասին ՄԻԵԴ որոշումների կատարմանը: Չնայած Ադրբեջանի եւ Խոշտանգումների դեմ եվրոպական հանձնաժողովի համագործակցությանը՝ Բաքուն արգելում է այդ կառույցին հրապարակել իր զեկույցները: Եվրոպայի խորհրդի անդամների թվում դա գործնականում կիրառում են միայն Ադրբեջանն ու Ռուսաստանը:
