Քաղաքացի Արուսյակ Ա.-ն ՀՀ քննչական կոմիտեի ներքին անվտանգության վարչությունում հայտնել է վարույթն իրականացնող անձի կողմից առերեւույթ խոշոր չափերով խարդախություն կատարելու վերաբերյալ տվյալներ:
ՀՔԾ-ից NEWS.am-ին հայտնում են, որ մասնավորապես՝ քաղաքացի Արուսյակ Ա.-ն հաղորդում է տվել այն մասին, որ վաշխառության վերաբերյալ իր դիմումի հիման վրա ՀՀ ոստիկանության նախկին քննչական գլխավոր վարչության Երեւան քաղաքի քննչական վարչությունում քննված քրեական գործի նախաքննությունն իրականացրած քննիչը իրենից վերցրել է 260 հազար ՀՀ դրամ՝ որպես քրեական գործով մի շարք վկաների հարցաքննելու համար ճանապարհածախս:
Բացի այդ, քրեական գործով դատաապրանքագիտական փորձաքննություն նշանակելու եւ փորձագետներին վարձատրելու պատրվակով նույն քննիչն իրենից պահանջել եւ ստացել է 1000 ԱՄՆ դոլար:
Պետական հատուկ ծառայություն իրականացնող պաշտոնատար անձի կողմից իր պաշտոնեական դիրքն օգտագործելով խաբեության եղանակով ուրիշի գույքի խոշոր չափերով հափշտակություն կատարելու դեպքի առթիվ ՀՀ հատուկ քննչական ծառայությունում ՀՀ քրեական օրենսգրքի 178-րդ հոդվածի 2-րդ մասի 1.1 եւ 2-րդ կետերի հատկանիշներով հարուցվել է քրեական գործ:
Կատարվում է նախաքննություն:
