Ադրբեջանը փորձում է թաքցնել Լեռնային Ղարաբաղի Հանրապետության բնակչության թունավորման բազմաթիվ փաստերը: Այս մասին Երևանում լրագրողների հետ զրույցում մայիսի 27-ին հայտնել է ԼՂՀ նախագահի մամուլի քարտուղար Դավիթ Բաբայանը:
Նրա խոսքով, Ադրբեջանը բազմիցս փորձել է քիմիական նյութեր օգտագործել Լեռնային Ղարաբաղի բնակչության դեմ: «Դա եղել է նաև խորհրդային տարիներին, երբ Հեյդար Ալիևը իշխանության եկավ: Նրանք թունավորում էին Ստեփանակերտի ջրային պաշարները, դրա համար էլ Ղարաբաղը,որը 1970-ին աշխահում առաջին տեղն էր զբաղեցնում երկարակեցեության մակարդակով ու վերջին տեղը՝ քաղցկեղով հիվանդացության մակարդակով, 1989-ին առաջին տեղն է զբաղեցրել հիվանդացության մակարդակով»,- նշել է Բաբայանը: Բացի դրանից շարունակել է նա, 1990-ին նրանք թունավորել են Ստեփանակերտի ջրամատակարարման ամբողջ ցանցը, ինչի հետևանքով բնակչության 1/3-րդը ջրից զրկվել էր: «Շատերը հիվանդանոցում էին հայտնվել: Նույնն է կատարվել նաև Շուշիի շրջանում: Երբ նրանք խոսում են Քարվաճառում հայկական ԱԷԿ-ի թափոնների մասին ( իհարկե դա այդպես չէ), մենք հասկանում ենք, որ դա կարող է հիմք դառնալ, որ եթե աստված մի արասցե նրանք ինչ -որ կերպ կարողանան ազդեցություն ունենալ այդ տարածքի վրա, ապա պարտադիր կթունավորեն գետերը, այսինքն ամբողջ Հայաստանին «ցեղասպանության» կենթարկեն»,- հավելել է Դավիթ Բաբայանը: