ԱԺ պատգամավոր Գուրգեն Արսենյանի որդու եւ վկաներից մեկի միջեւ առերեսում է տեղի ունեցել: Այս մասին NEWS.am-ի թղթակցի հետ զրույցում ասաց 20-ամյա Գուրգեն Արսենյանի փաստաբան Հայկ Ալումյանը:
«Որոշակի բաներ կան, որոնք նախաքննական գաղտնիք են: Նշեմ միայն, որ այդ առերեսման ժամանակ Գուրգեն Արսենյանի վերաբերյալ ոչ մի բացասական բան չի նշել, այնպիսի բան չի նշել, որը Գուրգեն Արսենյանի մեղադրանքը հիմնավորեր, ընդհակառակն է եղել»,- ասաց Հայկ Ալումյանը:
Ինչպես ավելի վաղ հաղորդել էինք, ապրիլի 17-ին մայրաքաղաքի գիշերային ակումբներից մեկում վիճաբանությունը սկսվել է կենցաղային շարժառիթով՝ երկու երիտասարդների միջեւ, որին հետագայում միացել են նաեւ նրանց ընկերները եւ հարաբերությունների պարզաբանումը շարունակվել է դրսում՝ ակումբի մոտ՝ վերաճելով խուլիգանության։ Մայիսի 16-ի դրությամբ՝ քրեական գործով ձեռք բերված ապացույցների հիման վրա որպես մեղադրյալ է ներգրավվել 5 անձ, այդ թվում Գուրգեն Արսենյանին:
Նշենք, որ պատգամավորի որդին ձերբակալվել է մայիսի 11-ին ոստիկանության աշխատակիցների կողմից «Բագրատաշեն» սահմանային անցակետում եւ ներկայացվել վարույթն իրականացնող մարմնին։
Նրան մայիսի 14-ին մեղադրանք է առաջադրել Քրեական օրենսգրքի 258-րդ հոդվածի 4-րդ մասով:
