Ազգային ժողովի փոխնախագահ, ԵԽԽՎ-ում հայկական պատվիրակության ղեկավար Հերմինե Նաղդալյանը իր աղմկահարույց հայտարարությունից հետո չի պատրաստվում պատվիրակության ղեկավարի պաշտոնից հրաժարական տալ:
« Ձեզ միայն իմ հրաժարակա՞նն է հետաքրքրում: Ես իմ աշխատանքն եմ անելու: Եթե ձեզ հետաքրքրում է, թե ինչ է լինելու հունիսին, եկեք, կտեսնեք»,- NEWS.am-ի թղթակցի հետ զրույցում ասաց Հերմինե Նաղդալյանը:
Նշենք, որ հունիսին ԵԽԽՎ-ի հերթական նստաշրջանն է: Շատ քաղաքական գործիչներ կարծում են, որ Նաղդալյանն իր հայտնի հայտարարությունից հետո պետք է հրաժարական տար, քանի որ նրա խոսքերն ադրբեջանական կողմը նստաշրջանի ընթացքում կօգտագործի Հայաստանի դեմ:
Հիշեցնենք, որ Հերմինե Նաղդալյանն ապրիլին լրագրողների հետ զրույցում, անդրադառնալով տարածքների փոխզիջման հարցին, ասել էր հետեւյալը. «Երբ կընդունվի կարգավիճակի մասին որոշում եւ աշխարհը կընդունի Ղարաբաղի անկախությունը, մենք ձեր հողերը, կամ էն հողերը, որոնց վրա մենք այսօր այդ իրավունքը չունենք, մենք այդ հողերը չենք ուզում, սա մեր բուֆերային գոտին է եւ մեր անվտանգության երաշխիքն է: Ուզում եմ ասել` նաեւ դրսում երբեմն օգտագործում են Մադրիդյան սկզբունքներից առանձնացված ինչ որ մի բան, ում ինչպես ձեռնտու է, բայց Մինսկի խմբի համանախագահները վերջին 5 տարվա հայտարարությունների ու քննարկումների ընթացքում ուշադրությունը սեւեռում են դրա վրա, որ այդ սկզբունքները համալիր են եւ իրար հետ պիտի հաստատվեն ու ընդունվեն եւ դրանց մեջ չկա որեւէ մեկը, որը գերակա է»:
