ՀՀ նախագահ Սերժ Սարգսյանը մայիսի 28-ին ԼՂՀ ՊԲ շարքային զինծառայող, ապրիլին զոհված Քյարամ Սլոյանին հետմահու պարգեւատրել է Առաջին աստիճանի «Մարտական խաչ» շքանշանով:
Հերոսի հայրը՝ Քյալաշ Սլոյանը, լրագրողների հետ զրույցում ասաց, որ հպարտ է. 18 տարի նա հերոս տղա է մեծացրել: Արագածոտնի մարզի Արտաշավան գյուղի միակ դպրոցում մայիսի 30-ին կբացվի Ռազմագիտության դասասենյակ, որը կկրի հերոս Քյարամ Սլոյանի անունը:
Քյալաշ Սլոյանը պատմեց, որ եղել է Ղարաբաղի այն վայրերում, որտեղ ծառայում էր որդին: «Ես եղել եմ այնտեղ, որտեղ սպանել են որդուս: Նրա գլխարկն այնտեղ էր: Ծառայակից տղաները ծաղիկներ էին դրել: Այնտեղ ես գտա նրա հագուստը, ափսեն, գդալը եւ այդ բոլորը հետս տուն բերեցի»,- կորստյան ցավը զսպելով ասում է Քյարամի հայրը՝ հավելելով, որ բոլոր իրերը կթողնի դասարանում, որը բացվելու է հայրենիքի խիզախ մարտիկի հիշատակին:
