Երեւանի քաղաքապետարանում աշխատանքային կրճատումներ չեն լինելու: Այս մասին այսօր՝ մայիսի 28-ին, Գարեգին Նժդեհի արձանի բացման հանդիսավոր արարողությունից հետո լրագրողների հետ զրույցում ասաց Երեւանի քաղաքապետ Տարոն Մարգարյանը՝ պատասխանելով հարցին, թե հնարավոր է` իրենց կառույցում էլ կրճատումներ լինեն, ինչպես մյուս պետական կառույցներում, որոնք հետեւում են վարչապետի հորդորին:
«Բազմիցս ենք ասել, որ աշխատանքային կրճատումներ չեն լինելու, քանի որ մեր եղած հաստիքները հազիվ են բավականացնում Երեւանի քաղաքի այն ծառայությունների մատուցման համար, որոնք պահանջում են երեւանցիները, իսկ երեւանցիների պահանջներն օրեցօր ավելանում են: Ես սա շատ նորմալ եմ համարում, քանի որ զարգացող քաղաք ենք եւ այսօրվա խնդիրները 3-4 տարի առաջվա խնդիրները չեն արդեն: Այդ պատճառով մեր հաստիքացուցակում մինիմալն է»,- ասաց Տարոն Մարգարյանը:
Ինչ վերաբերում է ծախսերը կրճատելուն, քաղաքապետի պնդմամբ, իրենք ամեն տարի են խնայողություններ անում, իսկ այս տարի հատկապես շատ խիստ են լինելու:
«Շռայլություններ հաստատ չեն լինելու»,- վստահեցրեց Տարոն Մարգարյանը:
