Արցախյան քառօրյա պատերազմում զոհված ժամկետային զինծառայող, 20-ամյա տանկիստ Վահե Զաքարյանը մոր հետ խոսել էր զոհվելուց մեկ ժամ առաջ:
«Ասաց՝ գնում ենք պալիգոններ, չանհանգստանաք, կարող ա՝ որոշ ժամանակ կապ չլինի: Դրանից հետո էլ ոչ մի ձեւով կապ չենք ունեցել իր հետ»,- NEWS.am-ի հետ զրույցում պատմեց զինծառայողի մայրը՝ Անժելա Զաքարյանը, որն ամուսնու հետ ՀՀ նախագահի նստավայր էր գնացել՝ ստանալու որդուն հետմահու շնորհված «Արիության մեդալը»:
Հրազդանցի Վահեի ծնողները Ռուսաստանի Դաշնությունում են եղել: Ապրիլի 2-ին որդու հետ խոսելուց մեկ ժամ անց հայրը՝ Սամվել Զաքարյանը, տեղեկություն է ստացել, որ որդին անհետ կորածների շարքում է, անմիջապես Հայաստան են եկել, պարզել, որ Վահեն Ջրակնում (Ջեբրաիլ) զոհվել է:
«Մենք դրանից հետո կապ ենք հաստատել անձնակազմի մյուս անդամների ծնողների հետ: Ասացին՝ այդ ժամին հրամանատարներից իրենց զանգել, ասել էին, որ գրոհի են գնում»,- պատմեց Վահեի հայրը:
Վահեն կարատեիստ էր: Իր սիրելի մարզաձեւով սկսել էր զբաղվել 9 տարեկանից: Վահեն Հայաստանի եռակի չեմպիոն է եղել, բազմաթիվ մրցումների է մասնակցել նաեւ արտերկրում, մեդալների արժանացել, մրցանակային տեղեր զբաղեցրել: Վահեն ստացել է Չեխիայում անցկացվող մրցմանը մասնակցելու հրավեր, սակայն հրաժարվել է ու զորակոչվել բանակ:
«Ասում էր՝ իսկական տղեն պետք ա ծառայի: Ու ծառայությունից էլ ոչ մի անգամ չի դժգոհել»,- ասաց հայրը: