2015-ին 1 մլրդ դրամ խնայողություն անելու շնորհիվ կհաջողվի վերանորոգել եւս 38 կմ ճանապարհ: Այս մասին մայիսի 30-ին՝ խորհրդարանում 2015-ի բյուջեի կատարողականը ներկայացնելիս, ասել է տրանսպորտի եւ կապի փոխնախարար Արթուր Առաքելյանը:

Նրա խոսքով՝ խնայողությունը հաջողվել է անել Համաշխարհային բանկի կենսականորեն կարեւոր ճանապարհների բարեկարգման ծրագրի շրջանակներում: Ծրագրի երկրորդ բաղադրիչը կերկարաձգվի մինչեւ 2019 թվականը: Ծրագրի ծավալը կազմում է 50 մլն դոլար, որոնցից 40 մլն դոլարը ՀԲ վարկն է, մնացածը՝ Կառավարության համաֆինանսավորումը: 2015-ին ծրագրի միջոցներով՝ 13.5 մլն դրամի չափով, պլանավորվում էր վերանորոգել 97 կմ ճանապարհ: Հիմա այդ նույն միջոցներով կվերանորոգվի 38 կմ ավելի շատ:

Ընդհանուր առմամբ 2015-ին կառուցվել է եւ վերանորոգվել մոտ 170 կմ ճանապարհ: