Զարգացման ասիական բանկի (ԶԱԲ) եւ Համաշխարհային բանկի (ՀԲ) ճանապարհային շինարարության ծրագրերը գերկատարվել են: Այդ մասին մայիսի 30-ին հայտնել է Հայաստանի տրանսպորտի եւ կապի փոխնախարար Արթուր Առաքելյանը` խորհրդարանում զեկույց ներկայացնելով 2015-ին պետբյուջեի իրականացման մասին:
Մասնավորապես, «Հյուսիս-Հարավ» ավտոճանապարհի բետոնային շինարարության 1-ին տրանշի հատկացումները գերկատարվել են 2 մլրդ դրամով, իսկ Համաշխարհային բանկի` շրջաններում ճանապարհների վերակառուցման ծրագիրը (Կենսական նշանակության ճանապարհների բարելավման ծրագիր) 8 մլրդ-ով: 2-րդ տրանշի շրջանակում` Աշտարակ-Թալին, որը եւս կառուցվում է ԶԱՀ-ի միջոցներով, դարձյալ գերկատարում է գրանցվել` 6,28 մլրդ դրամ 4,89 մլրդ-ի դիմաց: Այնտեղ հնագիտական պեղումներ են կատարվել, հողային աշխատանքներ եւ հողային շերտի նախապատրաստում: Իսկ «Հյուսիս-Հարավ» ճանապարհի 3-րդ տրանշի շրջանակում (Թալին-Լանջիկ հատված), որը ֆինանսավորվում է Եվրոպական ներդրումային բանկի վարկով, 9,7 մլրդ դրամի կանխավճար է մուծվել:
«Հյուսիս-Հարավ» 4 գծանի ճանապարհը կկրճատի իրանականից մինչեւ վրացական սահման հասնելու ժամանակը, ինչպես նաեւ հեռավորությունը` ներկայիս 556-ից մինչեւ 495 կմ` մի շարք լեռնային հատվածներ ուղղելու եւ նոր` ավելի ուղիղ հատվածների կառուցման հաշվին (Արարատից Վայոց ձորի մարզով մինչեւ Սիսյանի շրջանի Նորավան գյուղ, այնտեղից էլ` մինչեւ Քաջարան քաղաք): Շինարարության ընդհանուր արժեքը մոտ 960 մլն դոլար է, նախագծի հիմնական դոնորը Զարգացման ասիական բանկն է (մոտ 500 մլն դոլար):