Մինչեւ 2016 թվականի ավարտը Հունաստանի խորհրդատվական ընկերությունը կարող է ավարտել Երեւանի երկու աղբանոցների կառավարման շուրջ առաջարկների նախապատրաստումը: Այս մասին NEWS.am-ին տեղեկացրեց Երեւանի քաղաքապետի առաջին տեղակալ Կամո Արեյանը:
Նրա խոսքով, առաջարկներ են ներկայացվելու Երեւանի հարավում գտնվող Նուբարաշենի, ինչպես նաեւ հյուսիսային Աջափնյակի աղբանոցի մասով: Չի բացառվում, որ հաստատվի բիոգազի եւ աղբի վերամշակման գործարանի կառուցման հնարավորության մասին եզրակացությունը:
«Չգիտեմ, թե արդյունքում ինչ կերաշխավորեն հույն խորհրդատուները, նրանք նոր են սկսել աշխատանքը: Ժամանակ շատ ունեն, եւ չի բացառվում, որ մինչեւ տարեվերջ արդեն ինչ-որ բան պատրաստ կլինի»,- նշեց Արեյանը:
Հիշեցնենք, որ Նուբարաշենի աղբանոցի արդիականացումն իրականացվում է եվրոպական կառույցների հատկացրած միջոցներով: Ֆինանսավորման ընդհանուր ծավալը 24 մլն եվրո կկազմի. 8-ական մլն եվրո Վերակառուցման եւ զարգացման եվրոպական բանկից եւ Եվրոպական ներդրումային բանկից ստացված վարկ է, 8 մլն էլ Եվրոպական հարեւանության քաղաքականության ներդրումային գործիքի դրամաշնորհն է:
Միջոցները հատկացվելու են նոր աղբանոցի 5 գոտիներից 2-ի կառուցման համար: Ընդհանուր առմամբ, նոր աղբանոցի մակերեսը 29 հեկտար է կազմելու՝ գործող աղբանոցի 30 հեկտարի հարեւանությամբ:
