Գերմանական` Բոննի համալսարանին կից կլինիկաներից մեկը համաձայնել է կազմակերպել Լեռնային Ղարաբաղում ադրբեջանական ագրեսիայի հետեւանքով վիրավորված զինծառայող Ռուբեն Առաքելյանի բուժումը: Դրա համար անհրաժեշտ գումարի կեսն արդեն կա, եւ ազգականները սպասում են, որ ստացվի փողի մնացած մասը: Այդ մասին NEWS.am-ի թղթակցին հայտնել են Ռուբենի ազգականները:
««Էրեբունի» կլինիկայի բժիշկները եւ բուժքույրերը ամեն հնարավորն արեցին Ռուբենի համար, եւ մենք շատ ենք գնահատում նրանց օգնությունը», - նշել են վիրավոր տղայի ազգականները` հավելելով, որ ավելի ճիշտ եւ արդյունավետ կլինի նրա վերականգնումը կազմակերպել Եվրոպայում, որտեղ այդ ոլորտում ավելի մեծ փորձ ունեն, քան Հայաստանում:
Գերմանական կլինիկայում ծանոթացել են Ռուբենի փաստաթղթերին եւ խոստացել են կազմակերպել նրա վերականգնումը: Դրա համար պակասող գումարը, Ռուբենի ազգականների խոսքով, խոստացել են մոտ ապագայում փոխանցել Պաշտպանության նախարարության ներկայացուցիչները:
Ազգականները հավաստիացնում են, որ ինքը` Ռուբենը, այժմ իրեն լավ է զգում. ինքնուրույն շնչում է, կարող է ուտել եւ ընդհանուր առմամբ պատրաստ է տեղափոխմանը:
NEWS.am-ի թղթակցի հետ զրույցում Երեւանի Ավագանու անդամ Անահիտ Բախշյանը հայտնել է, որ պակասող` 43 հազար եվրո գումարը խոստացել է Ռուբենի հաշվին փոխանցել պաշտպանության նախարար Սեյրան Օհանյանը: Բայց առայժմ այդ գումարը չի փոխանցվել:
Հիշեցնենք, որ Ռուբենին օգնելու համար հետեւյալ հաշիվներն են բացվել.
ՎՏԲ Բանկ.
AMD 16041036866800
USD 16041036866801
EUR 16041036866802
RUR 16041036866803
Ստացող` Անահիտ Մկրտչյան