Պաշտոնական տվյալներով՝ հունվար-ապրիլին Հայաստանի պետբյուջեի հարկային եկամուտները տարեկան կտրվածքով աճել են 1.3%-ով: Աճը, իհարկե, խորհրդանշական է: Բայց հարկավոր է հաշվի առնել, որ ավելի վաղ անկում էր գրանցվել:

Հիշեցնենք, որ հունվար-մարտին հարկային հավաքագրումները 0.6%-ով նվազել էին: Հիմնական պատճառը 10.2 մլրդ դրամի կամ 10.5%-ի չափով ԱԱՀ-ի կրճատումն էր: ԱԱՀ-ի ազդեցությունը պետբյուջեի հարկային մուտքերի դինամիկայի վրա կազմել է 4.4%՝ «մինուս» նշանով:

Ապրիլին իրադրությունը փոխվել է: Պետբյուջեի հարկային եկամուտներն աճել են գրեթե 5.8 մլրդ դրամով կամ 6.3%-ով: Սրան մեծապես նպաստել է բնական պաշարների օգտագործման եւ բնության պահպանության վճարների հավաքագրումների աճը: Այս հարկատեսակի մասով հավաքագրումների գումարն ապրիլին աճել է շուրջ 3.2 մլրդ դրամով կամ գրեթե 3.9 անգամ: Սա նպաստել է 3.5%-ով պետբյուջե հարկային մուտքերի համեմատական աճին:

Ապրիլին դրական տեղաշարժ է արձանագրվել նաեւ ԱԱՀ-ի, ինչպես նաեւ ակցիզահարկի մասով: Այս երկու հարկատեսակները միասին պետբյուջեի հարկային եկամուտների՝ 1.5%-ի չափով համեմատական աճ են ապահովել: Հարկ է նշել, որ եկամտահարկի ներդրումն ավելի քիչ է եղել՝ 1.8%:

Ապրիլին արդյունաբերության մասով հարկային բազան ընդլայնվել է: Այսպես. ընթացիկ գներում արդյունաբերական արտադրանքի ծավալներն աճել են 10.9%-ով: Նույն ամսում ընթացիկ գներում 6.6%-ով աճել է ծառայությունների ծավալը: Բացասական միտումը պահպանվում է մանրածախ առեւտրաշրջանառության դինամիկայում: Այս գործոնը, ենթադրաբար, լրջորեն ազդում է երկրի պետբյուջեի հարկային եկամուտների վրա: