Ապրիլի սկզբին Լեռնային Ղարաբաղի դեմ ադրբեջանական ագրեսիայի հետեւանքով վիրավորված Էրիկ Բաբայանի վիճակը կայուն ծանր է, չնայած, ինչպես NEWS.am-ի թղթակցին ասաց Էրիկի մայրը՝ Ալվինա Կարապետյանը, արդեն դրական տեղաշարժ է նկատվում, եւ օրեցօր նա ավելի լավ է զգում:
Տրախեոստոմիկ (ձայնաստեղծ) խողովակի պատճառով Էրիկը դեռեւս չի կարողանում նորմալ խոսել, բայց ինքնուրույն է սնվում: Իսկ օրվա ընթացքում երբեմն արթուն է, երբեմն՝ քնած:
Ալվինա Կարապետյանն ասում է՝ չի բացառվում, որ ապագայում Էրիկը եվրոպական կլինիկաներից մեկում բուժման կարիք ունենա, որտեղ հնարավոր կլինի վնասված ոտքի էնդոպրոթեզավորում կատարել, բայց այդ մասին առայժմ վաղ է խոսել. հարկավոր է նախ մյուս խնդիրները լուծել եւ բուժել ներքին վնասվածքները:
Հիշեցնենք, որ վերջերս Էրիկը հերթական վիրահատությանն է ենթարկվել. վիրավորվելուց հետո նրա մոտ թոքի լուրջ վնասվածք կար, ինչը ժամանակի ընթացքում ձախ թոքային խոռոչում կպումներ էր առաջացրել: Վիրահատությունը նորմալ է անցել, հիմա Էրիկի վիճակն ընդհանուր առմամբ բավարար է գնահատվում, դրական տեղաշարժ կա:
Հավելենք նաեւ, որ Էրիկ Բաբայանն «Էրեբունի» բժշկական կենտրոն էր տեղափոխվել ծայրահեղ ծանր վիճակում՝ աղիների եւ ստամոքսի վիրավորումով: Բժիշկները երկու անգամ աղիների վիրահատություն են կատարել, հեռացրել են մեկ երիկամը, ինչից հետ երիտասարդի մոտ սուր երիկամային անբավարարություն էր առաջացել, ինչը հիմա բուժում են: Զինծառայողը նաեւ ձախ ոտքի կոնքազդրային հոդի վնասվածք է ստացել եւ էնդոպրոթեզավորման կարիք ունի, բայց դա հնարավոր կլինի կատարել միայն ներքին վնասվածքների բուժումից հետո: