2016-ին Հայաստանը կարող է մեծ կորուստ ունենալ մետալուրգիական կոմբինատներից գանձվող եկամտահարկի առումով: Այդ մասին մայիսի 31-ին հայտնել է Հայաստանի Պետեկամուտների կոմիտեի փոխնախագահ Արմեն Ալավերդյանը` ելույթ ունենալով խորհրդարանի Ֆինանսավարկային եւ բյուջետային հարցերի հանձնաժողովի նիստին:
Շոշափելի է հարկերի աճը Թեղուտի պղնձամոլիբդենային հանքավայրից, որն ամբողջությամբ գործարկվել է 2015-ից: Բայց, ցավոք սրտի, դա չի փոխհատուցում մնացածների մոտ անկումը: Զանգեզուրի պղնձամոլիբդենային կոմբինատը, որը տարիներով խոշորագույն հարկատուների եռյակում էր եւ ամեն տարի 40 եւ ավելի մլրդ դրամի հարկ էր վճարում, այս տարի կարող է ընդհանրապես եկամուտ չբերել պղնձի ցածր գների պատճառով: «Իսկ ԱԱՀ-ն նա, որպես արտահանող, հետ է ստանում: Մնում է միայն աշխատակիցների եկամտահարկը եւ եկամտահարկի կանխավճարային վճարումները», - պարզաբանել է Ալավերդյանը:
2016 թվականի I եռամսյակում լեռնամետալուրգիական ձեռնարկությունների շրջանառությունը կրճատվել է 12 մլրդ դրամով (ընթացիկ փոխարժեքով` 25 մլն դոլար) կամ 37 տոկոսով: Ապրիլին եւ մայիսին այդ միտումները շարունակվել են:
Նշենք, որ եթե 2015 հունիսին Չիկագոյի բորսայում պղնձի գինը կազմել է մեկ տոննայի դիմաց ավելի քան 6 հազար դոլար, այժմ մոտավորապես 4750 դոլար է:
