Մտահոգիչ նշաններ կան, որ Հայաստանը շահագրգռված չէ ԼՂ խնդրի խաղաղ կարգավորմամբ: Նման հայտարարությամբ է հանդես եկել Ադրբեջանի ԱԳ նախարար Էլմար Մամեդյարովը, հանդես գալով Բրյուսելում ՆԱՏՕ-Ադրբեջան խորհրդի նիստում:
«Չնայած խաղաղ կարգավորման հարցում Ադրբեջանի եւ միջազգային հանրության բոլոր ջանքերին, Հայաստանը շարունակում է բանակցություններում ծայրահեղ ապակառուցողական դիրքորոշում որդեգրել, եւ զորքերի շփման գծում ռազմական միջադեպեր սադրել»,- ասել է նա:
«Ադրբեջանական կողմը կարեւոր է համարում հրադադարի ռեժիմի ամրապնդումը` գրավյալ եւ սահմանային տարածքներում մարդկային զոհերից խուսափելու համար: Ներկայումս մենք գտնվում ենք, շատ նուրբ իրավիճակում: Հարցը ոչ միայն այն է, որ Հայաստանը ընդունում կամ չի ընդունում ԵԱՀԿ Մինսկի խմբի առաջարկները, այլ նրանում, որ Երեւանն, իսկապես, ցանկանո՞ւմ է ինչ-որ բան անել ստատուս քվոն փոխելու ուղղությամբ: Մենք կասկածներ ունենք Հայաստանի հետ կապված»,- Մամեդյարովին է մեջբերել ադրբեջանական Trend-ը:
«Հայաստանն աջակցում է գրավյալ տարածքներում նոր հայկական բնակավայրերի ստեղծմանը, Ադրբեջանի պատմա-մշակութային ժառանգության ոչնչացմանը` անօրինականորեն յուրացնելով բռնի տեղահանվածների ունեցվածքը, միաժամանակ փորձելով գրավյալ տարածքներին հաղորդել «պատմական հայկական» դիմագիծ: Հայաստանը փորձում է այդ տարածքներում իրավիճակն անշրջելի դարձնել: Այդ սադրիչ գործողությունները միայն ավելացնում են ժամանակավոր ճնշումն Ադրբեջանի վրա: Հայաստանը հաճախ է հղում անում ԼՂ խնդրի կարգավորման հարցում ռազմական ուժի չկիրառմանը, լռելով այն մասին, որ ռազմական ճանապարհով օկուպացրել է Ադրբեջանի տարածքի 20 տոկոսը, սպառնալիք ստեղծելով տարածաշրջանի ու ողջ միջազգային հանրության համար: Սրա հետ կապված միջազգային հանրությունը պետք է միանշանակ հայտարարի տարածաշրջանում ստատուս քվոյի պահպանման անթույլատրելիության մասին»,- ասել է Ադրբեջանի ԱԳ նախարարը:
Նշենք, որ վերջին ամիսներին հենց Ադրբեջանական կողմն է պարբերաբար խախտում հրադադարի ռեժիմը եւ դիվերսիաներ կազմակերպում: