Թաիլանդում արագընթաց մայրուղու վրա վթարի ժամանակ կողաշրջված միկրոավտոբուսում բռնկված հրդեհի հետեւանքով զոհվել են «Կումկլաօ Սակոլա» մասնավոր միջնակարգ դպրոցի 11 ուսուցիչներ, հայտնում է «Տխաի Ռաթ» թերթը
Պարբերականը՝ վկայակոչելով ճանապարհային ոստիկանությունը, նշում է, որ ողբերգությունը տեղի է ունեցել, երբ Բանգկոկի դպրոցի 14 ուսուցիչներ ու դպրոցական աշխատակազմի մեկ աշխատակից, որը վարում էր ավտոբուսը, ուշ երեկոյան վերադառնում էին Բանգկոկ՝ 200 կմ հեռավորության վրա գտնվող Ռայոնգ նահանգում դպրոցի մասնաճյուղերից մեկն այցելելուց հետո:
Պարբերականի տվյալներով, երբ միկրոավտոբուսը մտել է արագընթաց մայրուղի, որը կապակցում է Թաիլանդի Արեւելյան ափը Բանգկոկի հետ, առջեւի անիվի անվադողը պայթել է: Միկրոավտոբուսը կորցրել է կառավարումը, մխրճվել մայրուղու բաժանարար պատի մեջ, կողաշրջվել ու այրվել:
Նշում են,որ վթարից հետո ողջ են մնացել միայն չորս կին, որոնք կարողացել են կոտրել կողքի ապակիները ու դուրս գալ, երբ հրդեհը նոր էր սկսվում: Փրկվածներն են ավտոբուսը վարող կինը, երկու ուսուցչուհի եւ Ֆիլիպինների մեկ քաղաքացի, որը անգլերենի ուսուցչուհի է:
Բոլորը հիմա Չոնբուրի նահանգի հիվանդանոցներում են: Թերթը հայտնում է, որ 11 մարդ չի կարողացել դուրս գալ այրվող միկրոավտոբուսից: Նրանց մարմինները ուժեղ այրվել են, ինչը դժվարացնում է նրանց նույնականացումը: Եվ քանի որ ցուցակը դեռ չի հրապարակվել դեռ պարզ չէ՝ արդյոք զոհվածների շրջանում կան նաեւ օտարերկրացիներ: