5-10 տարուց Հայաստանն ու Վրաստանը կարող են դառնալ գյուղատնտեսական մթերքների կարեւոր արտադրողներ ոչ միայն կովկասյան տարածաշրջանում, այլեւ ամբողջ աշխարհում: Նման տեսակետ է լրագրողների հետ զրույցում հայտնել Վրաստանի գյուղատնտեսության առաջին փոխնախարար Գոչա Ցոպուրաշվիլի:
Նրա խոսքով այսօր գյուղատնտեսությունը զարգանում է եւ Վրաստանում, եւ Հայաստանում, իսկ երկու երկրների խնդիրներն ընդհանուր առմամբ նման են: Գյուղատնտեսության արդյունավետ զարգացման համար անհրաժեշտ է ճիշտ օգտագործել երկու երկրների բնական հնարավորությունները ու շեշտադրում անել այսպես կոչված բրենդային ապրանքների վրա, որոնք նրանք կարող են առաջարկել թե տարածաշրջանին, թե աշխարհին: Վրաստանի ու Հայաստանի դեպքում նման ապրանքները կարող են լինել պանիրը, կոնյակը, գինին, բանջարեղենն ու մրգերը, նկատել է փոխնախարարը:
Նոդար Կերեսիլիձեի խոսքով անցյալում Վրաստանի կառավարությունը առաջնայնություն չէր համարում գյուղատնտեսությունը ու դրա զարգացմանը պատշաճ ուշադրություն չէր հատկացվում: Ավելին՝ հիմնական շեշտադրումն արվում էր ներմուծման վրա՝ ցանկացած ապրանք, որը մյուս երկրներում ավելի էժան էր, ազատ մտնում էր վրացական շուկա: Սակայն այս մոդելը, փոխնախարարի խոսքով, անցյալում է մնացել, ու այսօր Վրաստանը ձգտում է զարգացնել գյուղատնտեսական ոլորտը, ինչի կապակցությամբ արդեն բազմաթիավ լավ մեկնարկած ծրագրեր կան, որոնց արդյունքները նկատելի կլինեն ոչ հեռավոր ապագայում:
«Մենք հույս ունենք, որ մոտ ապագայում՝ մի 5-10 տարի հետո, Վրաստանն ու Հայաստանը արդեն իրական գործոն կդառնան գյուղատնտեսական ապրանքների արտադրության ոլորտում՝ ոչ միայն մեր տարածաշրջանի, այլ աշխարհի համար,- նկատեց փոխնախարարը:
Հիշեցնենք, որ հունիսի 15-16-ը Թբիլիսիում անցնում է միջազգային համաժողով, որին մասնակցում են Հայաստանի ու Վրաստանի մասնագետները, գյուղատնտեսության ու առողջապահության նախարարությունների ներկայացուցիչները, նաեւ միջազգային փորձագետներ, որոնք պատրաստ են փոխանցել իրենց երկրների փորձը: Համաժողովի նպատակն է քննարկել պարենամթերային անվտանգության արդիական խնդիրները, գտնել դրանց լուծման ճանապարհներ ու գնահատել այդ ուղղությամբ ձեռնարկվող քայլերի արդյունավետությունը: Մասնավորապես փոքր արտադրությունների աջակցոււթյունը, միջազգային փորձագետների կարծիքով, կարող է օգնել բնակչությանը ապահովել բազմազան, որակյալ ու առավել էժանագին սննդամթերքով՝ թե Հայաստանում, թե Վրաստանում:
