Ազգային ժողովն այսօր՝ հունիսի 17-ին, վավերացրեց Հայաստանի Հանրապետության եւ Վերակառուցման եւ զարգացման միջազգային բանկի միջեւ 2016 թվականի մայիսի 12-ին ստորագրված «Էներգետիկայի ոլորտի ֆինանսական առողջացման ծրագիր» վարկային համաձայնագիրը։
Համաձայնագրին կողմ քվեարկեց 70 պատգամավոր, դեմ՝ 32-ը։
Մինչեւ քվեարկությունը ընդդիմադիր պատգամավորները հորդորեցին իրենց գործընկերներին դեմ քվեարկել այս վարկային համաձայնագրին։ ԲՀԿ-ական Միքայել Մելքումյանը հայտարարեց, որ իրենց խմբակցությունը դեմ է քվեարկելու։
«Երեկ զեկուցողն էլ չկարողացավ շատ հարցերի պատասխանել»,- ասաց ԲՀԿ-ական պատգամավորը։
ՕԵԿ խմբակցության ղեկավար Հեղինե Բիշարյանն էլ իր հերթին հորդորեց նախօրեին քննարկումներին չմասնակցած պատգամավորներին կողմ չքվեարկել։
«Հիմնական քննարկման ժամանակ երեկ մարդ էլ չկար, իսկ այսօր բոլորն ակտիվ խոսում են»,- արձագանքեց Գալուստ Սահակյանը։
Նախօրեին քննարկումներին «իր սենյակից ռադիոյով» հետեւած Ստեփան Մարգարյանը նշեց, որ այս վարկային համաձայնագիրն անընդունելի է եւ պետք է անպայման դեմ քվեարկել։
«Գայիք, դահլիճում քննարկեիք, ինչո՞ւ եք նիստի ժամանակ ձեր սենյակում ռադիոյով հետեւել, իսկ այսօր բովանդակային ելույթ ունենում»,- բարկացավ ԱԺ փոխնախագահ Հերմինե Նաղդալյանը։
Այնուամենայնիվ, համաձայնագիրը վավերացվեց։
Նշենք, որ «ՀՀ եւ Վերակառուցման եւ զարգացման միջազգային բանկի միջեւ 2016թ. մայիսի 12-ին ստորագրված «Էներգետիկայի ոլորտի ֆինանսական առողջացման ծրագիր» վարկային համաձայնագրով 30 մլն ԱՄՆ դոլար գումարի չափով վարկ է տրամադրվելու: Վարկի մարումը սկսվելու է 2030թ. նոյեմբերի 15-ից եւ ավարտվելու 2040թ. նոյեմբերի 15-ը: Վարկի մի մասը տրամադրվելու է Հայկական ատոմային էլեկտրակայանին՝ նպատակ ունենալով աջակցել էլեկտրաէներգիայի համարժեք եւ հուսալի մատակարարման պահպանման ջանքերին՝ էլեկտրաէներգիա արտադրող պետական ընկերությունների եւ էլեկտրաէներգիայի բաշխիչ մասնավոր ընկերության ֆինանսական վիճակը բարելավելու համար:
