PayPal-ը Հայաստանը շատ փոքր շուկա է համարում, բայց Հայաստանի Կենտրոնական բանկը շարունակում է բանակցել այդ համակարգը հանրապետությունում լիարժեք ներդնելու շուրջ: Այս մասին NEWS.am-ի թղթակցին հայտնեց Հայաստանի ԿԲ նախագահի տեղակալ Վախթանգ Աբրահամյանը:
Ըստ նրա, ԿԲ-ն իր կողմից անհրաժեշտ իրավական դաշտ ստեղծել է միջազգային վճարային համակարգերի համար: Դրանից հետո PayPal-ը, որպես մասնավոր ընկերություն, ինքն է որոշում, թե որ շուկաներում պետք է աշխատի:
«PayPal-ը միակ մատչելի լուծումը չէ, այլ հնարավոր մասնավոր հարթակներից մեկը: Եվ էլեկտրոնային առեւտրով զբաղվող ընկերությունները պետք է իրենց համար ամենահարմար տարբերակն ընտրեն: Դա արդեն մասնավոր բիզնեսի որոշումն է, որտեղ մենք իրավունք չունենք միջամտել: Կարող եմ մեկ բան հստակկ ասել. խնդիրը Հայաստանի ֆինանսական ռիսկերի մասին չէ: Պարզապես, ինչպես ասացի, Հայաստանն առայժմ համեմատաբար փոքր շուկա է համարվում: Նրանք դա այդպես են բացատրում»,- հայտարարեց նա:
Նկատառմանը, որ PayPal-ը լիարժեք գործում է Վրաստանում, որը մասշտաբով համապատասխանում է Հայաստանին, Վախթանգ Աբրահամյանը պատասխանեց. «Դա եւս մեկ հակափաստարկ է, որը մենք ներկայացնում ենք նրանց հետ բանակցություններում»:
