Հայաստանը պատրաստվում է 2016-ին 1 մլրդ 21 մլն կՎտ/ժ արտահանել Իրան: Այդ մասին հաղորդվում է Հայաստանում 2015-16 եւ 2016-17 թթ-ի սակագնային սեզոններին (օգոստոս-հուլիս) էլեկտրաէներգիայի գեներացիայի եւ մատակարարումների կանխատեսումային հաշվեկշիռներում, որոնք կազմել է «Էլեկտրաէներգետիկական համակարգի օպերատոր» ՊՓԲԸ-ն:
Նշված 1 021 մլն կՎտ/ժ-ից 533,2 մլն-ը նախատեսվում է արտահանել Հրազդանի ՋԷԿ-ի 5-րդ էներգաբլոկից, իսկ 487,7-ը` Երեւանի ՋԷԿ-ից:
Ընդհանուր առմամբ Իրան արտահանմանը բաժին է ընկնում էլեկտրակայաններից մատակարարումների մոտ 15 տոկոսը (Հայաստանը այլ երկրներ էլեկտրականություն չի արտահանում):
Իսկ 2017-ի առաջին 7 ամսում նախատեսված է արտահանել մոտ 657 մլն կՎտ/ժ, այդ թվում` ԵրՋԷԿ-ից` 514,4 մլն, իսկ «Հրազդան-5»-ից` 142,6 մլն: Արտահանումը դարձյալ կկազմի ցանցի մատակարարումների մոտ 15 տոկոսը:
Հիշեցնենք, որ Հայաստանը Իրան էլեկտրաէներգիա է արտահանում Երեւանի ՋԷԿ-ի համար ստացվող գազի դիմաց: Կայանը 1 խմ գազից մոտ 4,5 կՎտ/ժ է արտադրում, դրանից 3-ը տալիս է Իրանին, մնացածը տալիս է Հայաստանի ցանցին:
