Ռուսաստանի, Հայաստանի եւ Ադրբեջանի նախագահներ Վլադիմիր Պուտինը, Սերժ Սարգսյանն ու Իլհամ Ալիեւը հայտարարել են Լեռնային Ղարաբաղում շփման գծում իրադրության կարգավորմանը հավատարմության մասին եւ համաձայնել ավելացնել ԵԱՀԿ դիտորդների թիվը: Ըստ ՏԱՍՍ-ի, այս մասին լրագրողներին հաղորդել է ՌԴ ԱԳ նախարար Սերգեյ Լավրովը:
«Բացի այն, որ մենք հստակ քայլեր նախանշեցինք բանակցային գործընթացի ակտիվացման ուղղությամբ, նախագահները համաձայնեցրին եռակողմ հայտարարությունը, որում հաստատվում է շփման գծում իրադրության կարգավորմանը նրանց հավատարմությունը, նշվում հակամարտության գոտում աշխատող ԵԱՀԿ դիտորդների թվի ավելացման շուրջ նրանց համաձայնության մասին, հաստատվում է հակամարտության քաղաքական կարգավորմանն ուղղված բանակցություններում կայուն առաջընթացի ապահովման շուրջ նրանց հավատարմությունը»,- ասել է Սերգեյ Լավրովը:
Նա փաստել է, որ վերջին օրերին Լեռնային Ղարաբաղի շփման գծում «հրադադարն ընդհանուր առմամբ պահպանվում է»:
Նախագահների բանակցություններից հետո պատասխանելով լրագրողների հարցերին՝ Լավրովը նշել է, որ հրադադարին հետեւելու փաստը նշվել է երկրների ղեկավարների հայտարարությունում: Նա ուշադրություն է հրավիրել այն հանգամանքի վրա, որ «միջադեպերի կանխմամբ եւ հետաքննությամբ զբաղվում է ԵԱՀԿ քարտուղարությունը»: