Վարչապետ Հովիկ Աբրահամյանի գլխավորությամբ կառավարությունում այսօր սկսվել են 2017-2019 թթ. Հայաստանի Հանրապետության պետական բյուջեից կատարվելիք միջնաժամկետ ծախսերի ֆինանսավորման վերաբերյալ քննարկումները: Մասնավորապես, քննարկվել են ըստ ոլորտների ներկայացված ծրագրերը եւ առաջնահերթությունները:
Վարչապետը, դիմելով հանրապետական գործադիր մարմինների ղեկավարներին, նշել է, որ կառավարությունը պետք է վերանայումներ կատարի միջնաժամկետ ծրագրային ծախսերում եւ հանձնարարել է կրճատել այն ծախսերը, որոնք էական ազդեցություն չունեն ընդհանուր արդյունքի եւ գերատեսչությունների բնականոն գործունեության վրա: Ընդգծելով, որ անհրաժեշտ է անցնել խնայողության խիստ ռեժիմի եւ նվազեցնել պետական կառավարման համակարգի ծախսատարությունը՝ կառավարության ղեկավարը կոչ է արել պետական գերատեսչությունների ղեկավարներին լրացուցիչ քայլեր ձեռնարկել իրենց ղեկավարած կառույցների գործունեության արդյունավետության բարձրացման ուղղությամբ: