Եվրամիությունը երկարաձգում է հակառուսական պատժամիջոցները, սակայն դրանք այդպես էլ չեն հասել իրենց բուն նպատակին, իսկ Կրեմլի դեմ ձեւավորված ճակատը սկսում է փլուզվել, գրում է Der Spiegel-ը:
Հոդվածագրի կարծիքով ՌԴ նախագահ Վլադիմիր Պուտինը ճարպիկ քայլ է կատարել՝ Սանկտ Պետերբուրգի միջազգային տնտեսական համաժողովում հայտարարելով, թե Մոսկվան կարող էր հանել ԵՄ-ի դեմ գործող պատժամիջոցները, եթե Ուկրաինայում խաղաղ կարգավորման առաջընթաց նկատեր: Իսկ դրա համար անհրաժեշտ է ճնշում գործադրել Կիեւի վրա:
Թերթը նշում է, որ եթե Արեւելյան Եվրոպայի երկրները կողմ են Մոսկվայի դեմ կոշտ քաղաքականությանը, ապա Ֆրանսիայի, Գերմանիայի եւ Իտալիայի ներկայացուցիչները սկսել են ավելի հաճախ խոսել պատժամիջոցների աստիճանական թուլացման մասին:
ԵՄ պատժամիջոցների այս երկարաձգումը կարող է վերջինը լինել, կանխատեսում է հեղինակը՝ նշելով, որ այդ միջոցների քննադատները մատնանշում են, որ Ռուսաստանը չի կարող ինքնուրույն ապահովել Մինսկի համաձայնագրերի կատարումը, քանի որ կա նաեւ Ուկրաինան: Իսկ այդ երկրի կառավարությունը միայն ուրախ կլիներ, եթե հակառուսական պատժամիջոցները հնարավորինս երկար պահպանվեին:
Հակառուսական պատժամիջոցների երկարաձգման որոշումը Իտալիայի վարչապետ Մատտեո Ռենցին 2 շաբաթ ձգձգում էր՝ որպես փաստարկ բերելով այն հանգամանքը, որ այդ հարցն անհրաժեշտ է դիտարկել ավելի լայն կոնտեքստում. Ռուսաստանն անհրաժեշտ է Սիրիայի հակամարտության լուծման համար: Այդ ֆոնին վարչապետը նշել էր, որ ԵՄ-Թուրքիա միգրացիոն գործարքը կայուն չի թվում: Եթե այդ գործարքը տապալվի, Սիրիայի հակամարտության արագ կարգավորումը ԵՄ վերջին հույսը կլինի: