Հայկական կողմերը պետք է ժամանակն օգտագործեն Ադրբեջանի կողմից նոր արկածախնդրությունների պատրաստ լինելու համար: Այդ մասին հունիսի 23-ի մամուլի ասուլիսին հայտնել է Ազգային Ժողովի պատգամավոր Թեւան Պողոսյանը:
Նրա խոսքով, Ղարաբաղի հարցով որոշումները, որոնք իրականացվում են ճնշման հետեւանքով, չեն կարող արդյունավետ լինել: «Ես պատրանքներ չունեմ, թե Սանկտ Պետերբուրգում նախագահների հանդիպումից հետո լուրջ տեղաշարժեր կլինեն. դա ինչ-որ առումով ժամանակ է, եթե մենք խելացի լինենք եւ ճիշտ օգտագործենք ժամանակը, պատրաստ կլինենք իրադարձությունների ցանկացած զարգացման», - նշել է Պողոսյանը: Ադրբեջանի նախագահ Իլհամ Ալիեւը, ընդգծել է նա, կփորձի ապացուցել, թե իր վրա չի ազդում գործադրվող ճնշումը: Սանկտ Պետերբուրգում նախագահների ընդունած համատեղ հայտարարությունը, հավելել է Թեւան Պողոսյանը, եւս մեկ անգամ հաստատել է, որ ղարաբաղյան հարցում ստատուս քվոն պետք է պահպանվի:
Հիշեցնենք, որ Հայաստանի, Ռուսաստանի եւ Ադրբեջանի ղեկավարների եռակողմ հանդիպման արդյունքում հունիսի 20-ին Սանկտ Պետերբուրգում համատեղ որոշում է ընդունվել, որում պայմանավորվածություն կա` մեծացնել ղարաբաղյան հակամարտության շփման գծում միջազգային դիտորդների թիվը: