59-ամյա Անդրանիկ Վարդանյանը, որի որովայնը հունիսի 21-ին մետաղյա ձող է մտել, ժպիտով է հիշում իր հետ կատարվածը: Ինչպես ինքն է նշում, հրաշքով է ողջ մնացել, քանի որ մետաղյա ձողը կենսական ոչ մի օրգան չի վնասել:
«Բարձրացել էի ծառը, որ կեռաս քաղեմ, մեկ էլ աստիճանը ճոճվեց ու ես ընկա, արմատուրան էլ մտավ փորս: Միանգամից կողմնորոշվեցի, հարեւաններին ձայն տվեցի, լավ հարեւաններ ունեմ, եկան արագ: Ես դզող- փչող եմ, գիտեմ՝ ինչ պիտի անել այս իրավիճակում: Իրանց ասացի, որ բալգարկան բերեն, երկարացման լարը ու կտրեն ձողը, որովհետեւ որ ես ընկա, ձողն ինձնից 2 մետր էլ բարձր էր»,- պատմում է Անդրանիկ Վարդանյանը:
Կանչով Վարդանյանների տուն եկած «Շտապօգնության» աշխատակիցները հորդորել են ԱԻՆ կանչել: Մինչեւ փրկարարական ջոկատի գալը՝ հարեւանները Անդրանիկ Վարդանյանի պահանջով կտրել են մետաղյա ձողը:
«Ոչ մի ցավ չէի զգում, գիտակցությունս տեղն էր, մենակ որ մեքենայով տանում էին, «պառկած ոստիկանի» վրայով որ անցանք, ցավ զգացի»,- հիշում է 59-ամյա տղամարդը:
Անդրանիկ Վարդանյանին անմիջապես տեղափոխել են «Էրեբունի» բժշկական կենտրոն, որտեղ հետազոտելուց հետո վիրահատել են: Պարզվել է՝ ձողը վնասել է միայն բարակ աղիների պատերն ու միջընդերքը:
«Արտաքինից էլ երեւում էր այդ երկաթը՝ որովայնի առաջնային պատի մեջ մխրճված: Հիվանդը գիտակցության մեջ էր, սակայն րոպե առ րոպե վիճակը վատանում էր, որոշեցինք անհապաղ վիրահատել: Վիրահատության ժամանակ պարզեցինք, որ վնասվել են բարակ աղիների պատերն ու միջընդերքը: Աղիների պատերը վերականգնեցինք կարելու միջոցով, իսկ միջընդերքի վնասման պատճառով կար ներքին արյունահոսություն, դադարեցրինք, որովայնի խոռոչը դրենավորվեց, մաքրվեց, վիրահատությունը ավարտվեց»,- ասում է բժշկական կենտրոնի Ընդհանուր եւ լաբորոսկոպիկ վիրաբուժության բաժանմունքի վարիչ Յուրի Հարությունյանը:
Անդրանիկ Վարդանյանի վիճակը կայուն է, հետվիրահատական շրջանը հարթ է անցնում: Մի քանի օրից նա դուրս կգրվի:
