Հայաստանի եւ Ադրբեջանի նախագահները հավատում են Լեռնային Ղարաբաղի հակամարտության խաղաղ կարգավորմանը, «Ամերիկայի ձայնին» հայտնել է ԵԱՀԿ-ի Մինսկի խմբի ամերիկացի համանախագահող Ջեյմս Ուորլիքը:
«Եթե նրանք չհավատային բանակցությունների միջոցով խաղաղ լուծման հասնելու հնարավորությանը, իրար հետ բանակցություններ չէին վարի: Երկու նախագահն էլ դրականորեն են տրամադրված առաջընթացի հասնելու ուղղությամբ եւ խոստովանում են, որ այդ հարցը չի կարող լուծվել ռազմական ճանապարհով եւ որ պատերազմը աղետ կլիներ տարածաշրջանի համար», - նշել է Ուորլիքը:
Միջազգային միջնորդներն իրենց կողմից փորձում են կողմերին համոզել վերջապես հակամարտության հանգուցալուծման հասնել:
«Հենց հիմա է եկել ժամանակը: Նախագահները` ինչպես Հայաստանի, այնպես էլ Ադրբեջանի, խաղաղություն են ցանկանում, ցանկանում են կարգավորում բանակցությունների ճանապարհով: Ոչ հաջորդ տարի, ոչ երկու տարի անց, ոչ հինգ տարի անց ավելի հեշտ չի լինի: Ավելին, շփման գծում իրավիճակն ավելի վտանգավոր է ծանր սպառազինության, ականանետերի եւ հրետանու ներկայության պատճառով », - ընդգծել է Ջեյմս Ուորլիքը:
Նրա խոսքով, տարածաշրջանում իրավիճակ է առաջացել, որի դեպքում «յուրաքանչյուր վրիպումը կարող է հղի լինել լայնածավալ հակամարտության ռիսկով»:
Ուորլիքը հավելել է, որ ԱՄՆ-ը ողջունում է հակամարտության կարգավորման Պուտինի ջանքերը եւ որ Ռուսաստանը եւս հետաքրքրված չէ հակամարտության թեժացմամբ:
