ԵԱՀԿ ՄԽ ամերիկացի համանախագահ Ջեյմս Ուորլիքը հայտարարել է Ղարաբաղի խնդրի համապարփակ լուծման մասին, այլ ոչ թե փուլային, ինչպես փորձում է ներկայացնել ադրբեջանական կողմը: Այս մասին NEWS.am-ի թղթակցի հետ զրույցում ասել է ԼՂՀ ԱԺ պատգամավոր Վարդգես Բաղրյանը:
Պատգամավորը նշել է, որ Ղարաբաղի շուրջ տարածքները ԼՂՀ սահմանադրությամբ ամրագրված տարածքներ են: «Ոչ մի տարածք չի կարող հենց այնպես տրվել: Ամենաառաջնայինը Լեռնային Ղարաբաղի կարգավիճակի հարցն է: Մինչեւ Ղարաբաղի կարգավիճակի հարցը չդառնա անկյունաքարային, հակամարտությունը չի կարող լուծվել»,- նշել է Բաղրյանը:
Պատգամավորն ընդգծել է, որ տարածքների ոչ մի հարց չի կարող լինել, մինչեւ կարգավիճակը չպարզվի: «Տարածքների մասին անընդհատ խոսում է Ադրբեջանը, բայց այս պահին Ադրբեջանի վերահսկողության տակ են գտնվում Մարտակերտի եւ Մարտունու շրջանի հայկական տարածքները»,- հավելել է Վարդգես Բագրյանը:
Հիշեցնենք, որ «Ամերիկայի ձայնին» տված հարցազրույցում ԵԱՀԿ ՄԽ ամերիկացի համանախագահ Ջեյմս Ուորլիքը մասնավորապես ասել էր. «Սա այն դեպքը չէ, երբ կարելի է առանձնացնել մի հարց եւ ասել, որ այդ հարցով համաձայնություն ենք ձեռք բերել եւ կարող ենք առաջ շարժվել: Մենք խոսում ենք համապարփակ կարգավորման մասին, այնպես որ մենք պետք է համաձայնության գանք բոլոր հարցերով: Դեռեւս համաձայնություն է ձեռք բերվել առանձին ոլորտներում, այնինչ մյուսներում դա չկա»: