Արեւմտյան լրատվամիջոցները Թուրքիայի նախագահ Ռեջեփ Թայիփ Էրդողանի՝ ռուսական Սու–24 ռմբակոծիչը խոցելու համար խնդրած ներողությունը համարում են մեկուսացման վախի եւ աշխարհաքաղաքական հաշվարկների հետեւանք։
The Washington Post–ը գրում է, որ դա սպասելի քայլ էր, որը կարող է ճանապարհ բացել ռուս–թուրքական հարաբերություններում լարվածության թուլացման համար։ Թերթը գրում է, որ ներողությունով նամակը ստացվել էր այն պահին, երբ Եվրամիության եւ ԱՄՆ–ի հետ Անկարայի հարաբերությունները սրվել են միգրացիոն ճգնաժամի, մարդու իրավունքների եւ այլ վեճերի ֆոնին։
Թերթը նշում է, որ Էրդողանը, ըստ երեւույթին, սխալ էր հաշվարկել հետեւանքները, որոնք կարող էր ունենալ ռմբակոծիչը խոցելը. Ռուսաստանի ընդունած պատժամիջոցները լուրջ հարված հասցրեցին Թուրքիայի տնտեսությանը։
WP–ի մեկ այլ հոդվածում նշվում է, որ տարածաշրջանում ամենահեղինակավոր քաղաքական գործիչներից մեկը սկսել է լուծել արտաքին քաղաքական հակամարտությունները։ Այս մասին է վկայում ոչ միայն Ռուսաստանից խնդրած ներողությունը, այլ նաեւ Իսրայելի հետ հարաբերությունների կարգավորելը։
Ընդ որում, նշվում է, որ անգամ ռուս–թուրքական հարաբերությունների վերականգնման դեպքում Անկարան եւ Մոսկվան Սիրիայի հակամարտության հարցում բարիկադների տարբեր կողմերում են մնում։
Foreign Policy–ի փոխանցմամբ, եթե աշխարհում կա մի բան, որն Էրդողանն ատում է ավելի, քան իրեն վիրավորելը, դա ինչ–որ մեկից ներողություն խնդրելն է։ Կրեմլի հետ հարաբերությունների կարգավորման ակտիվ քայլերը տեղի են ունենում Մերձավոր Արեւելքում «Իսլամական պետության» աճող սպառնալիքների ֆոնին։
Ամսագիրը նաեւ նշում է, որ Էրդողանի որոշումը պայմանավորված է եվրոպական երկրների հետ Անկարայի հարաբերությունների վատթարացմամբ, ինչն ավելի կմեկուսացնի Թուրքիային միջազգային գործընթացներին մասնակցությունից։