ՀՀ ՊՆ մարդու իրավունքների եւ բարեվարքության կենտրոնի գործառույթներին, կարողություններին եւ ենթակառուցվածքներին ծանոթանալու նպատակով հունիսի 28-ին պաշտպանության նախարարություն է այցելել ՀՀ-ում ԱՄՆ արտակարգ եւ լիազոր դեսպան Ռիչարդ Միլսի գլխավորած պատվիրակությունը:
Այցելության շրջանակում հյուրերը հանդիպել են ՀՀ պաշտպանության նախարարի առաջին տեղակալ Դավիթ Տոնոյանի հետ: Հանդիպման ընթացքում քննարկվել են ՀՀ զինված ուժերում մարդու իրավունքների պաշտպանության կարողությունների եւ մեխանիզմների զարգացման, պաշտպանական քաղաքականության շրջանակում մարդու իրավունքների եւ բարեվարքության հայեցակարգերի ինտեգրման, հակակոռուպցիոն ծրագրերի մշակման հետ կապված հարցեր, ինչպես նաեւ դիտարկվել են համագործակցության նոր ուղղությունների զարգացման հնարավորությունները:
ՀՀ պաշտպանության նախարարի առաջին տեղակալ Դավիթ Տոնոյանի ուղեկցությամբ պատվիրակության անդամներն այցելել են ՀՀ ՊՆ մարդու իրավուքների եւ բարեվարքության կենտրոն, որտեղ ՀՀ պաշտպանության նախարարի ավագ օգնական - Կենտրոնի պետ, փոխգնդապետ Ա. Ավետիսյանը հյուրերին ներկայացրել է Կենտրոնի գործունեության հիմնական ուղղությունները:
Իր խոսքում դեսպան Միլսը նշել է. «Աշխարհով մեկ ԱՄՆ կառավարության հիմնական գերակայություններից մեկը մարդու իրավունքների ամրապնդումն է եւ աշխատանքը մեր գործընկերների հետ՝ մարդու իրավունքների իրացումն ու պաշտպանվածությունը բոլորի համար երաշխավորելու նպատակով: Գոհացուցիչ է տեսնել այս կարեւոր հարցի շուրջ ՀՀ պաշտպանության նախարարության աշխատանքն այնպիսի գործընկերների հետ, ինչպիսիք են կրթական փորձագետները, քաղաքացիական հասարակությունը: Զինված ուժերը, որտեղ հարգում են մարդու իրավունքները, որտեղ պայքարում են կոռուպցիայի ու չարաշահումների դեմ, ամուր է ու հզոր, եւ ժողովուրդը կարող է հպարտանալ իր զինված ուժերով»:
