Հայաստանի օդային սահմանի պաշտպանությունը շատ թանկ արժե եւ շատ արագ մաշվում, հնանում է. մեր երկիրը հնարավորություն չունի ամեն տարի նորացված ՀՕՊ միջոցներ ունենալու, ստեղծելու, գնելու: Այս մասին, այսօր՝ հունիսի 29-ին, ԱԺ-ում ՌԴ-ի հետ ՀՕՊ միացյալ համակարգ ստեղծելու համաձայնագրի նախագծի քննարկման ժամանակ նշեց ՀՀԿ խմբակցության քարտուղար Գագիկ Մելիքյանը:
«Մեր ռազմավարական դաշնակից Ռուսաստանը, ելնելով նաեւ իր շահերից առաջարկեց ստեղծել միացյալ ՀՕՊ համակարգ: Հենց այդ համակարգի շնորհիվ էր, որ Ադրբեջանից որեւէ օդանավ չթռավ:
ՌԴ-ն Հայաստանի հետ օդային սահման չունի եւ ՌԴ ՀՕՊ համակարգերը, որոնք գտնվում են Հայաստանի տարածքում չեն կարող Հարավային օկրուգի ՀՕՊ զորքերի հրամանատարի կողմից արդյունավետ կառավարվել ՀՀ տարածքում: Դրա համար ընդունվեց այդ համաձայնագրի 6-րդ հոդվածի 3-րդ կետը, որը նշում է. «Հավաքական անվտանգության առանձին շրջանի (Հայաստանի) ՀՕՊ միավորված համակարգի զորքերի համատեղ գործողությունների կառավարումն իրականացնում է ՀՀ ԶՈՒ ՀՕՊ զորքերի պետը»: Էլ ոնց գրվի, որ դուր գա»,-ընդգծեց Մելիքյանը:
Նրա խոսքով, այս համակարգի ստեղծման դեպքում ցանկացած որոշում կայացվում է միանձնյա, արագ եւ զեկուցվում ընդհանուր կառավարման համակարգին. «Այս համակարգը ենթադրում է հայտնաբերում՝ լոկացիոն սարքերով եւ ուղեկցում՝ թռչող սարքերով: Այնուհետեւ լոկացիոն սարքերով հանձնարարական է լինում խոցող սարքերին՝ հայտնաբերել եւ խոցել: Այս ամբողջ համակարգը, աշխատանքը տեւում է առավելագույնը 50 վայրկյան: Այնպես եք ներկայացնում, կարծեք թե պետք է հեռախոսով զանգեն, հրաման տան, հետո որոշում կայացնեն, հետո մերժեն, հետո որոշեն՝ թռչել, թե ոչ: Այսքան երկար չի տեւում»:
Գագիկ Մելիքյանը նշեց, որ Արցախի ՀՕՊ-ն առանձին համակարգ է եւ գործում է Հայաստանի ՀՕՊ-ից առանձին՝ թեեւ ստանում է աջակցություն եւ միջոցներ: «Ղարաբաղի ՀՕՊ-ը քառօրյա պատերազմի ժամանակ հայտնաբերեց եւ խոցեց 15 անօդաչու թռչող սարք»,-ասաց նա ու հավելեց. «Համաձայնագիրը բխում է թե Ռուսաստանի, թե Հայաստանի շահերից: Կա՞ն ռիսկեր, իհարկե կան, որ Ադրբեջանն ու Թուրքիան կարող են ստեղծել ավելի ուժեղ ՀՕՊ համակարգ, բայց նման բան չի կարող լինել, որովհետեւ Հայաստանի տարածքում տեղադրված է ամենաուժեղ համակարգը: Համաձայնագիրը պետք է վավերացվի որքան շուտ այնքան լավ»,- իր խոսքն ամփոփեց նա:
Հիշեցնենք, որ այսօր Ազգային ժողովում շարունակվում է քննարկվել 2015 թվականի դեկտեմբերի 23-ին Մոսկվայում ստորագրված «Հայաստանի Հանրապետության և Ռուսաստանի Դաշնության միջև Հավաքական անվտանգության կովկասյան տարածաշրջանում հակաօդային պաշտպանության միավորված տարածաշրջանային համակարգ ստեղծելու մասին» համաձայնագիրը:
Այս համաձայնագիրը հակազդեցություն է առաջացրել որոշակի քաղաքական ու քաղաքացիական շրջանակների կողմից, որոնք նշում են, որ սրանով Հայաստանը Ռուսաստանին է զիջում նաեւ իր օդային տարածքն ու անվտանգությունը: Նշվում է, որ ըստ այդ համաձայնագրի` ստեղծվելու է Հայկական հակաօդային պաշտպանությունը կարգավորող մի մարմին, որը կառավարվելու է Ռուսաստանի կողմից: