Եթե ինքնուրույն քաղաքականություն վարեինք, մինչ Ռուսաստանի հետ ՀՕՊ միավորված համակարգի ստեղծման համաձայնագիրն ԱԺ բերելը կունենայինք 200 միլիոն դոլարի այն սպառազինությունները, որը պարտավորվել էր մեզ տրամադրել ՌԴ-ն: Այս մասին, այսօր՝ հունիսի 29-ին, ԱԺ-ում հիշյալ համաձայնագրի նախագծի քննարկման ժամանակ նշել է «Ժառանգություն» խմբակցության պատգամավոր Զարուհի Փոստանջյանը՝ հավելելով» «Որեւէ մեկը չասաց, որ այդ սպառազինությունն այսօր, այս ժամին այստեղ է լինելու»:
Անդրադառնալով պնդումներին, թե Հայաստանը չպետք է խանդի, որ Ռուսաստանն ու Ադրբեջանը ռազմավարական դաշնակիցներ լինեն, Փոստանջյանը նկատեց. «Մենք չենք խանդում, մենք արձանագրում ենք, որ միակ երկիրը, որ այսօր արտադրում է հարձակողական զենք, որը կարող է օգտագործվել մարդկության դեմ, Ռուսաստանն է, որը վաճառում է դրանք Ադրբեջանին, որն էլ արդեն մեր դեմ օգտագործել է: Իսկ փաստի մասին միայն բարձրաձայնելը և արձանագրելը անկախ պետականության համար բավարար չէ: Ի՞նչ գործընթաց եք սկսել միջազգային ատյաններում՝ պատասխանատվության կանչելու թե ՌԴ-ին, թե Ադրբեջանին: Իհարկե՝ ոչինչ»:
Ըստ նրա՝ պետք է հայտարարվեր, որ մենք նման համաձայնագիր չենք ստորագրելու մինչև այս հարցերին լուծում չտրվի. «Այդ ժամանակ հասկանալի կլիներ, որ մենք անկախ քաղաքականություն ենք վարում… Հիմա նորից հրավիրել են ՌԴ, մեր անունից հայտարարվել է այսպիսի համաձայնագրի ստորագրման մասին, և մենք, ըստ էության, դարձել ենք Ռուսաստանի արբանյակը»:
Փոստանջյանի խոսքով, 1921 թվականի մարտի 16-ի ռուս-թուրքական պայմանագրի դրույթները չեն փոխվել, որոնք վերաբերում են հայկական հողերին: «Պուտինը եկավ Հայաստան, գնաց ՌԴ ռազմաբազա, այնտեղից հայտարարվեց, որ եթե Ադրբեջանի ղեկավարությունը որոշի ուժային ճանապարհով իր իրավասությունները վերականգնել Ղարաբաղի նկատմամբ, ռազմակայանը կարող է մտնել զինված հակամարտության մեջ՝ ՀԱՊԿ շրջանակներում ստանձնած պայմանագրի պարտավորությունների համաձայն: Ադրբեջանը կիրառեց ագեսիա, ի՞նչ արեց ՀԱՊԿ-ն, որևէ արձագանք կա՞ այս ուղղությամբ, ի՞նչ է արել ՀԱՊԿ-ն։ Հիմա որ ամպագոռգոռ գոռում եք, որ այդ ուղղաթիռները կթռչեն, չգիտեմ՝ ինչեր կանեն, ո՞վ է ձեզ թույլ տալու, որ ուղղաթիռ թռցնեք, դուք ո՞վ եք, դուք ընդամենը արբանյակ եք»,-հայտարարեց Փոստանջյանը:
Հիշեցնենք, որ այսօր Ազգային ժողովում շարունակվում է քննարկվել 2015 թվականի դեկտեմբերի 23-ին Մոսկվայում ստորագրված «Հայաստանի Հանրապետության և Ռուսաստանի Դաշնության միջև Հավաքական անվտանգության կովկասյան տարածաշրջանում հակաօդային պաշտպանության միավորված տարածաշրջանային համակարգ ստեղծելու մասին» համաձայնագիրը:
Այս համաձայնագիրը հակազդեցություն է առաջացրել որոշակի քաղաքական ու քաղաքացիական շրջանակների կողմից, որոնք նշում են, որ սրանով Հայաստանը Ռուսաստանին է զիջում նաեւ իր օդային տարածքն ու անվտանգությունը: Նշվում է, որ ըստ այդ համաձայնագրի` ստեղծվելու է Հայկական հակաօդային պաշտպանությունը կարգավորող մի մարմին, որը կառավարվելու է Ռուսաստանի կողմից: