Եվրամիությունից Մեծ Բրիտանիայի դուրս գալուց հետո Գերմանիան ԵՄ-ում շատ ավելի կարեւոր դերակատարում ձեռք կբերի: Այս մասին հունիսի 29-ին մամուլի ասուլիսի ժամանակ ասել է Քաղաքական ու միջազգային հետազոտությունների հայկական կենտրոնի տնօրեն, քաղաքագետ Աղասի Ենոքյանը:
Նրա խոսքով, Մեծ Բրիտանիայում հանրաքվեի հաղթողները խոստովանել են, որ չգիտեն, թե որն է իրենց հաջորդ քայլը, չգիտեն իրենց անելիքը: «Այսինքն նրանց խնդիրը ընդամենը այս հարցը առաջ տանելն էր: Քաղաքական օրակարգի բացակայությունը լուրջ խնդիր է: ԵՄ-ն կարող է թուլանալ ու ավելի մեղմ կառույց դառնալ, որպեսզի մյուս անդամ երկրները այն լքելու ցանկություն չունենան: Բայց կարծես թե երկրորդ միտումն է հիմա գերակշռում՝ ԵՄ-ի ամրապնդումը»,- նկատել է Ենոքյանը:
Քաղաքագետը համաձայն չէ այն տեսակետին, որ ԵՄ կազմից Մեծ Բրիտանիայի դուրս գալուց հետո Ռուսաստանի դիրքերը կուժեղանան: «Լրջորեն կուժեղանա Միացյալ նահանգների դերակատարումը, չնայած շատ են խոսում այն մասին, որ հենց Մեծ Բրիտանիան է ԱՄՆ քաղաքականությունն առաջ մղողը»,- հավելել է Աղասի Ենոքյանը:
ԵՄ –ից Մեծ Բրիտանիայի դուրս գալու վերաբերյալ հանրաքվեն կայացել է հունիսի 23-ին: Երկրի դուրս գալու կողմնակիցները հաղթել են ձայների 51.9 տոկոսով:
