Իսրայելի Կնեսետը հուլիսի 5-ին՝ գերմանական Բունդեսթագի կողմից Հայոց ցեղասպանությունը ճանաչող բանաձեւի ընդունումից մեկ ամիս անց, Ցեղասպանության թեմայով քննարկումներ կանցկացնի: Այս մասին Zoryan Institute-ին տված հարցազրույցում հայտարարել է իսրայելցի պատմաբան Յաիր Աուրոնը:
Նրա խոսքով, Իսրայելը ձեռնպահ է մնացել Հայոց ցեղասպանության հարցով հրապարակային քննարկումներից եւ ազատ քվեարկության անցկացումից՝ վախենալով փչացնել Իսրայելի եւ ԱՄՆ-ի առանցքային դաշնակից Թուրքիայի կառավարության հետ հարաբերությունները:
Պատմաբանը համաձայն չէ Հոլոքոստի եզակիության մասին կարծիքին: «Ես չեմ կարող դա ընդունել, քանի որ Հոլոքոստը եզակի չէ, եւ անհրաժեշտ է այն ուսումնասիրել որպես ցեղասպանության մեկ օրինակ: Իսրայելը՝ որպես Հոլոքոստի հետեւանքով առաջացած պետություն, չպետք է փոխանակում կատարի այլ մարդկանց ցեղասպանության մասին հիշողության հարցում»,- ասել է Աուրոնը:
Ըստ նրա, եթե ամերիկյան նախագահները խուսափում են «ցեղասպանություն» բառից, ապա Իսրայելն ավելի առաջ է գնացել՝ ոչ միայն ժխտելով Հայոց ցեղասպանությունը, այլեւ հարգելով ղարաբաղյան հակամարտության ժամանակ Խոջալուում ադրբեջանցիների փոքր խմբի ողբերգական մահվան հիշատակը:
Պատմաբանը Կնեսետին կոչ է արել ազատ քվեարկություն անցկացնել Հայոց ցեղասպանության ճանաչման հարցով: «Հիմա, երբ Իսրայելն ու Թուրքիան վերականգնում են դիվանագիտական կապերը, Կնեսետը պետք է հստակ հաղորդագրություն ուղարկի այն մասին, որ Իսրայելի հետ հարաբերությունները չեն կարող պատանդ դառնալ պատմական անվիճելի փաստերն ընդունելուց հրաժարվելու՝ Թուրքիայի դիրքորոշմանը, հատկապես Գերմանիայի կողմից դրանց մասնակցությունը ճանաչելուց հետո: Հարկավոր է նաեւ ընդգծել, որ Իսրայելի կողմից Հայոց ցեղասպանության ճանաչումը չի առնչվում Թուրքիայի հանդեպ բարեկամական կամ թշնամական վերաբերմունքին, դա ավելի շատ Իսրայելի բարոյական պարտականությունն է»,- ամփոփել է Յաիր Աուրոնը: