ԱՄՆ-ն, որպես ԵԱՀԿ Մինսկի խմբի համանախագահ երկիր, հավատարիմ է մնում միջնորդական ջանքերին՝ ղարաբաղյան հակամարտության կարգավորման հասնելու համար: Այս մասին հայտարարել է ԱՄՆ պետքարտուղարի Եվրոպայի հարցերով օգնականի տեղակալ Քեթլին Կավալեկը:
Նրա խոսքով, ապրիլին շփման գծի երկայնքով բռնության բռնկումը վկայում է հստակ եւ անմիջական սպառնալիքի մասին, որն առկա է ԵԱՀԿ տարածաշրջանում ձգձգված հակամարտությունների պատճառով:
Քեթլին Կավալեկն ընդգծել է, որ ղարաբաղյան հակամարտությունը ռազմական լուծում չունի:
«Հույս ունենք, որ Հայաստանի եւ Ադրբեջանի առաջնորդները կշարունակեն աշխատել Մինսկի խմբի համանախագահների հետ՝ մայիսի 16-ին Վիեննայում եւ հունիսի 20-ին Սանկտ Պետերբուրգում կայացած հանդիպումների արդյունքներն իրականացնելու ուղղությամբ: Կողմերին կոչ ենք անում կատարել պարտավորությունները, որոնք ստանձնել են բարձրագույն մակարդակով հանդիպումների ընթացքում, հակամարտության գոտում ԵԱՀԿ դիտորդական առաքելության ընդլայնման, միջադեպերի հետաքննության մեխանիզմների ներդրման եւ համապարփակ կարգավորման շուրջ բանակցությունների առաջընթացի համար»,- հավելել է Կավալեկը:
